Një prej moderatoreve më të njohura të programeve sportive, Enkeleida Zeko, sot e ka lënë mënjanë punën për disa minuta. Në studion e “Rudina” në Tv Klan, ajo ka rrëfyer për një status të ri të cilin e gëzon prej afro dy vjetësh. Vajza e saj e vogël Ester i ka ndryshuar të gjithë jetën, si edhe shumë nënave të reja, por emocionet moderatorja e sportit i ka përjetuar me mënyrën e saj.
Duke folur për herë të parë publikisht për familjen, Enkeleida e ka të vështirë t’i mbajë lotët kur fillon e kujton çastin që i ndryshoi jetën, çastin kur veten e ndjeu ndryshe: “Që në momentin kur mësova se isha shtatzënë, u ndjeva ndryshe. Është shumë e veçantë edhe mënyra se si e mësova. Kishim pak kohë që donim të kishim fëmijë. Disa herë ishte bërë pak dëshpëruese. Ishte hera e parë që bëja testin në shtëpi. Bashkëshorti më tha “mos e bëj, se nuk dua të mërzitesh”, por unë e bëra në fshehtësi. Dhe në mëngjes, kur pashë testin, nuk e ke idenë se çfarë lumturie ndjeva…” – tregon Enkeleida për momentin e parë që mësoi shtatzëninë.
Pas atij momenti, gjithçka për të ndryshoi: “U ndjeva ndryshe nga ai çast, fotografuam duart tona me testin e shtatzënisë. Edhe pse nuk ishim të sigurt. Vrapuan te doktori për t’u siguruar. Ester ishte vetëm 5 ml… Lumturia ishte shumë e madhe, edhe sepse në atë periudhë po jetoja një periudhë jo shumë të mirë profesionale. Ester erdhi si një bekim në momentin më të keq më të vështirë”
Prej afro dy vjetësh, Enkeleida dhe Flori, bashkëshorti i saj, po jetojnë një marëdhënie ndryshe, me më shumë dashuri. E pyetur si ka ndryshuar kjo marrëdhënie mes tyre, Zeka përgjigjet: “Flori është një bashkëshort i mrekullueshëm. Është shoku im më i mirë. Më ka ndihmuar jashtëzakonisht gjatë periudhës së shtatzënisë. Ester ka shtuar edhe më shumë dashurinë tonë…”
Koha që kalon me vajzën dhe familjen, për Enkeleidën është shumë e çmuar. Mes të tjerave, ajo tregon se e bija, edhe pse gati 2-vjeçare vazhdon të ushqehet me gji, ndaj edhe është mjaft e lidhur me të. Por nuk e pengon kurrsesi që edhe të vazhdojë punën me pasion në programet sportive.
Marre nga Class
