Aktori dhe moderatori i njohur Gentian Zenelaj ka folur rrallëherë për raportin me partneren e tij. Së fundmi i ftuar në emisonin ‘Tring Stars’ me gazetaren Katerina Trungu, pas një video mesazhi surprizë nga bashkëshortja, Genti ka folur për dashurinë e jetës së tij.
I emocionuar ai ka rrëfyer disa nga momentet më të rëndësishme me të, duke thënë: “Aida është dashuria e jetës sime, nuk do gjej mundësi ta falënderoj për gjithçka që ka bërë në jetën time. Aida ka modifikuar rrënjësisht jetën time. Nëse ka një arsye pse unë jam sot kështu si jam, një nga ata persona është Aida. Ajo mori një djalë shumë çapkën, shumë të shpërndarë, energjik, gati dhe vetëdestruktiv e ndërtoi një kryetar familje, ndërtoi një njeri siç e donte ajo. Është për t’u përgëzuar durimi që ka pasur me mua sepse aktorët janë natyra shumë të vështira, natyra me prova të stërzgjatura, me turne. Momenti kur luajmë një rol sidomos po të jetë rol impenjativ, ne përfshihemi kaq shumë sa ajo të flet dhe ti nuk je me të, je me personazhin, jeton me personazhin dhe nuk ka qenë e kollajtë për Aidën. Jemi natyra shumë të kundërta, megjithatë kemi gjetur një gjuhë të përbashkët. Kemi vendosur ta ndërtojmë marrëdhënien tonë mbi dialogun, pra mbi njëfarë demokracie të padiskutuar”.
Kujtojmë se Zenelaj e ka nisur karrierën e tij si aktor shumë vite më parë në programin e humorit ‘Portokalli’, ndërsa sot drejton emisonin investigativ ‘Stop’ dhe është një nga figurat më të dashura për publikun shqiptar./revistawho.com
