Tre ditë më parë Rita Ora mbushi 30 vjeç e në këtë ditë të veçantë organizoi një festë, pa marrë parasysh se jetojmë në kohë pandemie, duke shkelur kështu rregullat anti-covid. Fotot ku këngëtarja së bashku me miqtë e saj ishin mbledhur në një restorant, ku të ftuar ishin 30 persona, bënë xhiron e mediave të huaja. Këto të fundit bëjnë të ditur se Rita ka paguar 10 mijë pound gjobë pas thyerjes së rregullave.
Vetë Rita ka reaguar me një postim në rrjete sociale ku kërkon falje publike.
“Përshëndetje të gjithëve, unë organizova një festë të vogël me miqtë e mi për të festuar 30-vjetorin. Ky vendim ishte i momentit me pikëpamjen e gabuar se ne po dilnim nga izolimi dhe nuk kishte problem.
Më vjen vërtet shumë keq që theva rregullat dhe e kuptoj se kjo i vë njerëzit në rrezik. Ky ishte një gabim serioz dhe i pafalshëm. Duke pasur parasysh kufizimet e kuptoj se sa të papërgjegjshme ishin veprimet e mia dhe marr përgjegjësi të plotë. Ndihem veçanërisht e turpëruar kur kuptoj se sa fort kanë punuar njerëzit për të përballuar këtë sëmundje të tmerrshme dhe jam plotësisht e vetëdijshme për sakrificat që njerëzit dhe bizneset kanë bërë për të na ndihmuar ne që të jemi të sigurt. Edhe pse kjo nuk do e ndreqë gabimin, dua të kërkoj sinqerisht falje”, shkruan Rita.
