Mbrëmjen e kaluar, me plot momente emocionuese, u mbajt gjysmëfinalja e parë e festivalit të ‘Eurovizion’. Në fund të mbrëmjes u zgjodhën 10 këngët të cilat do të jenë në finalen e madhe që do të mbahet më 12 maj në Lisbone. Dy nga finalistët janë edhe këngëtarët shqiptarë Eugent Bushpepa dhe Eleni Foureira e cila performoi nën flamurin e Qipros.
Menjëherë pas performancës ata kanë treguar emocionet e para në një konferencë ta mbajtur dhe aty Eugenti tregoi se kënga ‘Mall’ ju dedikohet të gjithë shqiptarëve.
Ndërsa Eleni e cila prej vitesh jeton në Greqi edhe pse përfaqëson Qipron, tregoi se i erdhi për të qarë në momentin kur Greqia nuk u kualifikua për në finale.
“Në fakt nuk e dëgjova që unë kisha kaluar në finale. Po mendoja ku është kamera, pastaj pashë kamerën dhe u emocionova që kalova në finale. Po vrapoja si e çmendur, me taka të larta dhe kur u ktheva po pyesja Greqia, Greqia? Dhe pashë që Greqia nuk kishte kaluar në finale, isha gati të qaja. Më vjen shumë keq, edhe për shtetet e tjera, por Greqia është atdheu im. Do doja gjërat të ishin ndryshe”, tha Eleni. /revistawho.com
