Gazetarja Jonida Shehu humbi të ëmën një vit më parë, si pasojë e infektimit me Covid-19. E ftuar në emisionin “Goca dhe Gra”, ajo ka folur për marrëdhënien që kishte me të dhe kujtimet, me të cilat tani jeton.
“Unë kam qenë shumë e lidhur me mamin sepse im atë e ka humbur jetën më herët. Unë kam qenë 23-24 vjeçe, kështu që gjithë kohën e moshës që duhet të rritesha kam jetuar me mamanë time derisa jam shkëputur që kam nisur bashkëjetesën. Deri në ditën e fundit pavarësisht se ajo kishte zgjedhur të jetonte vetëm dhe jo me ne, pothuajse kemi qenë në mënyrë konstante bashkë me njëra- tjetrën. Ajo shkonte- vinte, nëse kisha një orë të lirë ajo vinte tek unë, para se të flinim bëheshin telefonatat përkatëse. Nuk e lidh mungesën me periudha për mua çdo sekondë është mungesë shumë e madhe. Vuajtja ka qenë shumë e madhe sidomos muajin e parë. Kur kthehesha nga puna, ishte rituali që hyja në makinë dhe bëja telefonatën e parë dhe ka qenë një periudhë shumë e vështirë. Më pas fillova t’i shkruaja në WhatsApp duke e ditur që nuk do të më kthejë përgjigje po e kalova atë cikël dhe jam vetëm te mendimet tani”,- ka rrëfyer ajo.
