Atë e njohim me emrin “Kabir” nga seriali “Sarasvatiçandra”, por emri i vërtetë i tij është Ashish Kapoor. Duhet thënë se Ashish është një ndër aktorët më të suksesshëm në Indi dhe është nominuar për disa çmime të rëndësishme në “Indian Telly Awards”. Ai e ka filluar karrierën në aktrim në vitin 2010 me serialin horror “Phit Koi Hai” në rolin e “Vikram”. Më pas ai mori pjesë në disa seriale, por në role të vogla. Ishte viti 2011 ai që i solli famën e madhe me serialin “Dekha Ek Khwaab”, ku Ashish luante rolin kryesor me emrin “Udaiveer”. Rol për të cilin në intervistën tonë thotë se është i preferuari i tij. Ai gjithashtu ka luajtur në serialet më të ndjekur në Indi si “Yeh Rishta Kya Kehlata Hai”, “Savitri”, ‘Waaris”, “Sarasvatiçandra” përkrah aktorëve me famë botërore Jennifer Winget dhe Gautam Rode. Kapoor na tregon për “Sarasvatiçandrën”, xhirimet dhe planet për të ardhmen në këtë intervistë ekskluzivisht për revistawho.com.
Si e fitove rolin tek “Sarasvatiçandra”?
Kam punuar për atë shtëpi produksioni edhe më parë. Ata më kërkuan të bëja një rol tjetër që ishte Kabir. Dhe sigurisht unë pranova.
Me kë shoqëroheshe më shumë gjatë xhirimeve të “Sarasvatiçandrës”? Dua të them cili nga aktorët ishte shoku yt i ngushtë?
Të gjithë pa diskutim. I kam akoma miq. Flas me ta akoma. Me çdonjërin prej tyre.
Si ishte të punoje me Jennifer Winget dhe Gautam Rode?
Shumë, shumë mirë. Ata mbeten shokë të mirë edhe pas 2 viteve të mbarimit të “Sarasvatiçandrës”.
Mund të na tregosh ndonjë rast që të ka mbetur në mendje gjatë xhirimeve?
Po, mbaj mend kur ishim duke xhiruar në Londër. Ishte shumë ftohtë dhe kemi pirë aq shumë kafe që të na mbante ngrohtë (qesh). Nuk ishim mësuar me klimën e Anglisë dhe ishte e vështirë që të xhironim. Kafja na shpëtoi nga ngrirja.
Ti je një aktor shumë i suksesshëm, cili është roli yt i preferuar?
Roli në serialin “Dekha ek khwab” (Pashë një ëndërr) sepse isha dhe roli kryesor me emrin “Udaiveer”.
Ka qenë ëndrra jote të bëheshe aktor apo…
Jo, ëndrra ime ishte të hapja një restorant ose palestër. Dhe tani po punoj për këtë. Shpresoj së shpejti…
Çfarë të bën të lumtur?
Nipi im 4 vjeç. Ai më sjell direkt buzëqeshjen në fytyrë.
Je në një lidhje aktualisht?
Jam i martuar me punën time.
Cilësitë që duhet të ketë partnerja jote?
Sinqeritetin, të ketë sens humori dhe të jetë intelektuale.
Ke ardhur ndonjëherë në Europë?
Po, në Londër me stafin e “Sarasvatiçandrës”, në Paris dhe së shpejti afër Shqipërisë, në Itali.
Ke në plan të vish edhe në Shqipëri?
Nuk jam i sigurtë.
Për çfarë do shkosh në Itali, për punë apo për pushime?
Për pushime.
Po shkon me dikë të veçantë apo…
Jo, me familjen.
Cilat janë hobit e tua?
Të luaj playstation, noti dhe të bëj palestër.
Mund të thuash diçka për fansat e tu shqiptarë?
Faleminderit shumë për suportin dhe dashurinë që më dhuroni. Zoti ju bekoftë./ revistawho.com
