Rudina Xhunga, autorja dhe drejtuesja e “Dritare” në “Vizion Plus”, njëherësh shkrimtare e disa librave bestseller, flet në një intervistë për ‘revistawho.com’ për nënën që e ka frymëzuar, duke na përcjellë shembulin e një nëne të urtë, të dashur, mësimplotë, shembullin e një nëne. Sepse në fakt, nuk ka nëna të mira e të këqija, ka vetëm nëna…
Cili ishte urimi që i bëre sot nënës tënde?
E urova sot mamin tim, që të më mësojë të bëhem gjyshe e mirë, siç më mësoi të jem nënë si ajo.
A ka ndryshuar dashuria për të apo të shprehurit e kësaj dashurie pasi u bëre nënë vetë?
Ka ndryshuar të shprehurit. Dikur nuk i thosha fjalë, që tani ia them, se Alana m’i thotë mua.
A je bërë më shumë feministe pasi linde vajzë?
Po, jam bërë shumë më e ndjeshme dhe e vëmendshme ndaj grave, vajzave dhe njerëzve në përgjithësi. Mëmësia është shkolla më e bukur e një gruaje.
Si do të doje të bëhej vajza jote, çfarë ëndërron për të?
Do të doja të ishte krenare për mua, si unë për nënën time. Çfarë do bëhet, e vendos ajo. Unë dua t’i mësoj rrugën, jo destinacionin. Unë timin e gjeta vetë.
