Pas dekadash heshtjeje, ish-mbreti i Spanjës, Juan Carlos, ka folur për herë të parë për ngjarjen që e ka ndjekur gjithë jetën: vdekjen aksidentale të vëllait të tij, Alfonso-s, kur ai ishte vetëm 18 vjeç.
Në kujtimet e tij të reja me titull “Juan Carlos I d’Espagne: Réconciliation”, 87-vjeçari që prej vitesh jeton në Dubai, rrëfen se si një lojë e pafajshme me një armë u kthye në tragjedi.
“Nuk do të shërohem kurrë nga kjo tragjedi. Rëndësia e saj do të më ndjekë përgjithmonë,” – shkruan ai në librin që sapo është botuar në Francë.
Ngjarja daton më 29 mars 1956, kur Alfonso, vetëm 14 vjeç, humbi jetën pasi një plumb e goditi në ballë. Juan Carlos tregon se po qëndronte në shtëpinë familjare në Estoril, Portugali, për të vizituar babanë e tij, mbretin në ekzil Juan de Borbón.
Si kadet në Akademinë Ushtarake, ai po luante me një pistoletë kalibri .22, dhuratë nga një toger, duke menduar se ishte bosh.
“Nuk kishim idenë që kishte mbetur një plumb në dhomë,” – shkruan ish-mbreti. “U qëllua një plumb në ajër, ai u përplas dhe goditi vëllain tim drejt e në ballë. Ai vdiq në krahët e babait tonë.”
Nëna e tij, Princesha María de las Mercedes, kujton se dëgjoi britmat dhe më pas pa bashkëshortin e saj të mbulonte trupin e djalit me flamurin spanjoll, ndërsa pistoleta u hodh në det.
Nuk pati hetim zyrtar për rrethanat e ngjarjes, dhe vetëm katër ditë më vonë Juan Carlos u kthye në Spanjë, ku gjenerali Franco po e përgatiste si pasardhës të tij. Siç shpjegon në libër, vdekja e vëllait ishte pika që e ndryshoi përgjithmonë:
“Më mungon; do të doja ta kisha pranë, të flisja me të. Humbja e tij më la boshllëk të madh. Pa vdekjen e tij, jeta ime do të kishte qenë më pak e zymtë, më pak e trishtë.”
Autobiografia e Juan Carlos-it, e bashkëshkruar me gazetaren dhe historikanen Laurence Debray, pritet të dalë në versionin spanjisht në dhjetor, në përvjetorin e 50-të të vdekjes së diktatorit Franco dhe rikthimit të monarkisë.
Ish-mbreti abdikoi në vitin 2014, mes skandaleve dhe akuzave për korrupsion, dhe që atëherë jeton larg Spanjës, në Dubai. Djali i tij, Mbreti Felipe VI, nuk e ka ftuar atë në ceremonitë zyrtare që do të mbahen më 21 nëntor.
