Në kulmin e vëmendjes për këngëtaren Parashqevi Simaku dhe hitet e saj ndër vite, Pirro Çako mori të drejtat e këngës së njohur “E duam lumturinë” – një prej më të famshmeve të interpretuara nga Simaku – dhe e ngarkoi në kanalin e tij zyrtar në YouTube, duke qenë se i përket si autor i muzikës.
Prej më shumë se 9 vitesh, kjo këngë kishte qenë e disponueshme në një kanal jozyrtar në YouTube, ku kishte grumbulluar mbi 5.5 milionë klikime. Shumë njerëz riktheheshin për ta dëgjuar, duke e mbajtur atë të gjallë në kujtesën kolektive.
Vetëm gjatë javës së fundit, këngës iu shtuan mbi 200 mijë klikime, një rritje e ndjeshme për shkak të interesit të krijuar nga lajmet për këngëtaren në SHBA. Ndërkohë, versioni i vjetër me miliona klikime është fshirë nga YouTube, dhe kënga është ngarkuar sërish, këtë herë në kanalin zyrtar të Pirro Çakos.
Megjithëse veprimi i Çakos është i drejtë dhe i justifikuar, pasi ai ka të drejtat e autorit, shumëkush e keqkuptoi, duke menduar se kantautori po e hiqte këngën për ta privuar publikun nga dëgjimi i saj. Në realitet, Çako e ka zhvendosur këngën nga një kanal i paidentifikuar në platformën e tij zyrtare.
Në mes të aludimeve të shumta në rrjetet sociale, Elton Ilirjani, i cili po kujdeset për Parashqevi Simakun, reagoi duke sqaruar situatën dhe theksuar se këngëtarja ruan respekt të veçantë për Pirro Çakon dhe të atin e tij, Gaqo Çako.
“Ju lutemi mos abuzoni me emrin e Pirro Çako! Kërkesë e Parashqevisë! Ajo e respekton Pirron dhe e kujton me mall atë dhe babain e tij, Gaqo Çako!” shkroi Ilirjani, duke bërë thirrje për më shumë kujdes ndaj kësaj çështjeje.
