Aktorja e njohur turke, Cemre Baysel, ka shokuar fansat me një rrëfim të sinqertë dhe shumë personal. Prej 8 vitesh, ylli i serialeve turke ka jetuar me një masë në gjoks, të cilën e ka mbajtur të fshehtë nga publiku. Tani, aktorja ka zbuluar se gjithçka ka marrë fund pas një operacioni urgjent që u krye ditët e fundit në një spital privat në Turqi.
Në një video të postuar në rrjetet sociale, Baysel tregoi se operacioni ishte i pashmangshëm pasi masa kishte filluar të rritej. “Mos u shqetësoni, gjithçka shkoi mirë… kemi kaluar shumë,” tha ajo me buzëqeshjen e saj karakteristike, duke qetësuar fansat që mbetën të tronditur nga lajmi.
Burime pranë saj thonë se bëhet fjalë për një kist beninj, por pas një monitorimi të gjatë prej 8 vitesh, mjekët këshilluan heqjen e tij për të shmangur ndërlikimet e mundshme. Aktorja ka falënderuar publikisht ekipin mjekësor dhe ndjekësit e saj për mbështetjen, duke theksuar se procesi i rikuperimit po ecën shumë mirë.
Historia e saj po komentohet gjerësisht në mediat dhe rrjetet sociale turke, ku shumë e quajnë Cemre Baysel një shembull guximi dhe transparence. Aktorja, një nga emrat më të dashur të ekranit turk, ka treguar se edhe në momentet më të vështira nuk e ka humbur forcën dhe optimizmin.
