Marrëdhënia mes Katy Perry dhe Orlando Bloom duket se po kalon një nga momentet më të vështira të saj – dhe gjithçka nisi nga një fluturim në hapësirë.
Një burim i afërt me çiftin ka rrëfyer për Daily Mail se një debat i ashpër shpërtheu mes tyre në prill, pas udhëtimit të këngëtares me raketën e Jeff Bezos, Blue Origin. Aktori, sipas burimit, nuk e priti mirë këtë hap të partneres së tij, madje e cilësoi si një veprim “të turpshëm” dhe “qesharak”. “I tha se gjithçka dukej absurde,” është shprehur burimi.
Katy, nga ana tjetër, kishte shpresuar në mbështetjen dhe entuziazmin e Bloom, por reagimi i tij ishte larg pritshmërive. “Sigurisht që u ndje e lënduar,” vijon burimi. “Imagjino të shkosh në hapësirë dhe partneri yt të mos impresionohet aspak.”
Kjo përplasje e fundit është vetëm një nga disa tensionet që kanë shoqëruar çiftin muajt e fundit. Një tjetër “thikë pas shpine” për këngëtaren, sipas burimeve, është fakti që Orlando pritet të marrë pjesë në dasmën e Jeff Bezos dhe Lauren Sánchez në Itali – pa Katy-n, e cila ndodhet në turne. “Ata janë më shumë miqtë e saj sesa të tij,” tha burimi, duke e përshkruar vendimin si “shenjë mosrespekti”.
Katy Perry dhe Orlando Bloom janë bashkë që nga viti 2016 dhe kanë një vajzë katërvjeçare, Daisy. Megjithatë, marrëdhënia e tyre duket se është tronditur edhe nga problemet profesionale. Albumi më i fundit i Katy-t, “143”, nuk ka pasur pritjen që ajo shpresonte, dhe stresi që ka sjellë kjo situatë thuhet se ka ndikuar negativisht edhe në lidhjen e tyre.
Një tjetër burim për Page Six ka deklaruar prerë: “Ka mbaruar. Ata po presin të mbarojë turneu i saj për të zyrtarizuar ndarjen.” Turneu përfundon më 7 dhjetor 2025.
