Jessie J ka ndarë një rrëfim prekës me ndjekësit e saj në Instagram, duke zbuluar se është përballur me një nga sfidat më të mëdha të jetës: diagnostikimin me kancer në gji, në një fazë të hershme.
Në një video të publikuar më 3 qershor, këngëtarja britanike foli hapur për situatën e saj:
“Dua të ndaj diçka me fansat e mi dhe me njerëzit që më duan. Jam kjo që jam, pasi gjithmonë kam ndarë çdo gjë që kam përjetuar.
Para se të publikohej kënga ‘No Secrets’, u diagnostikova me kancer gjiri në fazë të hershme.”
Jessie J tregoi se ka ndjekur çdo hap të nevojshëm mjekësor që prej momentit të diagnozës.
“E theksoj fjalën ‘fazë e hershme’. Kanceri është i tmerrshëm në çdo formë, por kjo më jep forcë. Gjatë gjithë kësaj kohe kam bërë analiza pa fund.”
“Nuk kam folur shumë për këtë… por ndihem më mirë kur e ndaj me të tjerët.”
Këngëtarja u shpreh se dëshiron të jetë transparente, jo vetëm për ta përballuar vetë më lehtë, por edhe për të ndihmuar të tjerë që mund të përjetojnë të njëjtën gjë.
“Nuk flas mjaftueshëm për këtë. Nuk kam pasur kohë ta përpunoj si informacion, sepse kam punuar shumë.
Por e di sa shumë më ka ndihmuar në të shkuarën, kur kam ndarë me të tjerët gjërat që kam kaluar.
Të gjithë më kanë dhënë dashuri, mbështetje dhe më kanë rrëfyer historitë e tyre.”
Pavarësisht forcës me të cilën e përballon situatën, Jessie J njoftoi se do të tërhiqet përkohësisht nga skena, për t’iu nënshtruar një ndërhyrjeje kirurgjikale pas koncertit të saj në Summertime Ball më 15 qershor.
“Do të kthehem me gjoks të madh dhe muzikë të re!”, tha ajo me një dozë humori.
Jessie është nënë e një djali dyvjeçar, Sky, të cilin e ka me partnerin e saj Chanan Safir Colman. Njoftimi i saj ngjalli një reagim të madh nga ndjekësit dhe miqtë e saj, përfshirë këngëtaren Rita Ora:
“Je personi im i preferuar. Lutem për ty. Edhe mamaja ime ka kaluar të njëjtën gjë, e di sa e vështirë është psikologjikisht operacioni dhe çdo trajtim. Jam këtu për ty.”
