Të jesh i famshëm nuk është e lehtë. Kjo do të thotë që shumë njerëz të dinë mbi jetën tënde private dhe shumë herë të të godasin aty ku të dhemb. E njëjta gjë ka ndodhur me këngëtaren britanike, Lily Allen. Ajo postoi disa statuse në Twitter ku kritikonte paragjykimet për emigrantët dhe myslimanët. Më pas disa persona filluan t’i shkruanin se ajo ka probleme mendore. Përgjigjja e Allen ishte: “Kam probleme mendore, jam bipolare, kam depresion pas lindjes dhe stres post traumatik, e bën kjo mendimin tim të pavlefshëm?”. Por sulmet nuk mbaruan me kaq. Dikush tjetër e pyeti këngëtaren sesi përfundoi me stres traumatik. Lily iu përgjigj: “Kur ndodhesha në krevatin e spitalit me djalin tim të pajetë mes këmbëve të mia për 10 orë.” Pas kësaj, komente që e quanin gënjeshtare vërshuan për këngëtaren. Madje dikush e fajësoi për vdekjen e fëmijës për shkak të përdorimit të lëndëve narkotike. “Nuk dështova, djali im u mbyt nga kordoni që i ishte lidhur në qafë”, -i ktheu përgjigje Lily e cila njoftoi se do e mbyllë Twitterin. Megjithatë dikush i quajtur Dennis shkruajti në Twitterin e këngëtares se do e mbajë ai llogarinë e saj për disa kohë. Këngëtarja e humbi fëmijën në muajin e gjashtë të shtatzënisë dy vite më parë. Ajo ka vendosur mos t’i rikthehet më muzikës, të paktën kështu ka deklaruar./revistawho.com
