Kinematografia amerikane ka humbur një nga emrat e saj më të mëdhenj, regjisorin dhe skenaristin David Lynch. Ai ndërroi jetë në moshën 78-vjeçare, si pasojë e një sëmundjeje kronike të mushkërive.
Lajmi i trishtë u bë i ditur nga familjarët, të cilët zbuluan se Lynch kishte vuajtur nga emfizema, një sëmundje kronike që lidhet me pirjen e duhanit. Në gusht të vitit 2024, regjisori kishte ndarë publikisht diagnozën e tij.
Lynch lindi në Missoula, Montana, në vitin 1946, por pjesën më të madhe të fëmijërisë e kaloi në Idaho. Gjatë jetës së tij, ai u martua katër herë dhe ishte në një lidhje të gjatë me aktoren Isabella Rossellini, ylli i filmit të tij të famshëm Blue Velvet.
Karriera e tij e shquar përfshin tre nominime për Oscar për regjinë më të mirë, për filmat Blue Velvet, The Elephant Man dhe Mulholland Drive. Në vitin 2019, ai u nderua me një Oscar për arritje jetësore, ndërsa në vitin 1990 fitoi Palmën e Artë në Festivalin e Filmit në Kanë për filmin Wild at Heart.
