Rregullat e lojës së Akademisë Amerikane thonë se filmi nuk duhet të shfaqet ‘online’ apo në ndonjë vend tjetër deri sa të mbahet mbrëmja gala e ndarjes së çmimeve “Oskar”. Mirëpo kjo nuk po ndodh me “Shok”, filmin kosovar i cili ndryshoi përgjithmonë historinë e kinematografisë shqipfolëse. Njëri nga aktorët e këtij filmi, Kushtrim Shermeti, ka thënë për Kolona.al se kjo gjë e rrezikon seriozisht fitoren e “Shok” në Oskar. Sipas tij, ka ndodhur edhe më parë kur ndonjë filmi i është marrë çmimi për shkak se nuk janë respektuar rregullat e lojës. “Me këtë rrezikohet seriozisht sepse ka ndodhur edhe më parë që janë privuar nga ky çmim shumë producentë për shkak se nuk kanë pasur kontrollin të duhur. Problemi është që këtë e bëjnë vetë njerëzit e zanatit, prandaj është e vështirë ta kontrollosh. Por, jemi duke bërë një luftë të madhe dhe besoj që do ta tejkalojmë këtë gjë. Besoj që do ta kemi përkrahjen e qytetarëve tanë, pasi që ata i janë gëzuar shumë nominimit të tij”, ka thënë ai.
