Kapiteni i Kombëtares së futbollit shqiptar Lorik Cana, disa ditë pasi trajneri De Biasi shpalli tërheqjen e tij, ka thënë edhe vetë fjalët e lamtumirës. Pa shprehur trishtim por vetëm krenari, Lorik Cana vendosi që përshëndetjen e gjatë me tifozë e dashamirës ta bëjë në rrjetet sociale. Themi përshëndetjen, pasi nga fjalët e tij kuptohet se Cana nuk është larguar përfundimisht nga fusha. Ai ka shprehur falenderime duke treguar se ka nevojë për pushime të gjata. “Përshëndetje të gjithëve. Siç lajmërova pas Euro 2016, unë vendosa të tërhiqem nga kombëtarja shqiptare e futbollit. Mendova se ishte koha e duhur, pas arritjes më të madhe në sportin shqiptar. Ndjehem i nderuar që kam përfaqësuar njerëzit dhe kombin tim gjatë të gjithë karrierës. Sapo kam mbushur 33 vjeç dhe pas 14 viteve në nivelet më të larta, më duhet pak kohë për të rikuperuar për t’u shëruar nga dëmtimet. Unë vendosa gjatë kësaj vere që të refuzoj të gjitha ofertat që më kishin mbërritur, në mënyrë që të jem në gjendje që të kthehem përsëri në formën më të mirë dhe shpresoj të jem i gatshëm për arritje dhe projekte të reja. Ju falenderoj të gjithëve për mbështetjen tuaj, ju uroj më të mirat Shihemi së shpejti”, ka shkruar ai. Ne i urojmë yllit të futbollit shqiptar pushime të mbara deri në rikthim.
