Joe Biden është shpallur President i Shteteve të Bashkuara të Amerikës pas një gare të fortë me Donald Trumpin. Në Janar Biden do t’i zërë vendin Trump-it në Shtëpinë e Bardhë dhe bashkë me të do të jetë edhe bashkëshortja, Jill Biden. Por kush është gruaja, e cila do të jetë Zonja e parë e Amerikës?
Jill Jacobs ka lindur në qershor 1951 në New Jersey. Ajo është më e madhja nga 5 motrat dhe u rrit në periferi të Philadelphias. Para se të martohej me Joe, ajo ishte e martuar me ish-futbollistin Bill Stevenson. Jill u prezantua me Joe përmes vëllait të tij tre vite pasi Joe humbi gruan e tij të parë nga një aksident automobilistik. Asokohe Joe ishte senator ndërsa Jill ende në kolegj.
“Unë kisha dalë vetëm me djem me xhinse e atlete ndërsa Joe u shfaq me pallto dhe këpucë. “Zot, nuk ka për të funksionuar kurrë, as në 1 milion vjet”-mendova. Ai ishte 9 vjet më i madh se unë, por ne dolëm për të parë një shfaqje në teatër dhe u miqësuam”-ka treguar Jill për takimin e tyre të parë.
Jill tha se Joe e propozoi atë 5 herë para se ajo të pranonte. Çifti u martua në New York në 1977. Vajza e tyre, Ashley, lindi në 1981.
Znj. Biden, 69 vjeç, ka kaluar dekada duke punuar si mësuese. Ajo ka dy diploma master dhe doktoraturë nga Universiteti i Delaware. “Mësimdhënia nuk është ajo që unë bëj. Është ajo ç’ka unë jam!”- është shprehur ajo.
