Ato dëshirojnë si të gjithe ne, t’ia thonë çdo ditë nënave të tyre se sa shumë i duan… Por ne u kërkuam që këtë 8 mars t’i thonë fjalë zemre përmes revistawho.com grave më të rëndësishme të jetës së tyre. Ah, ato janë larg dhe kanë ditë e ndoshta muaj pa u përqafuar me mamin. Sot mesazhi i urimit nga ana e vajzave tona të famshme nuk do të bëhet në celular, por do të vijë si një përqafim i ngrohtë nga larg, prej të cilit do të marrin nga pak të gjitha zonjat, e jo vetëm mbretëreshat e tyre. Gëzuar!
Afërdita Dreshaj do të vijë tani me letrën e saj kushtuar së ëmës në revistawho.com në të cilën është derdhur shumë mirënjohje.
Mamushi im, nuk e di a do t’i gjej ndonjëherë fjalët e duhura për të të falenderuar për gjithçka ke bërë për mua, Honën dhe Arbërin. Unë kam qenë mjaftueshëm e rritur sa për të kuptuar çdo sakrificë tënden pasi humbëm babin. Të kam parë çdo ditë, teksa bëje dy, e ndonjëherë edhe tre punë që ne të mos na mungonte asgjë.
U bëre nënë e baba për ne dhe kurrë nuk bërtite, kur nuk të dëgjova të thoje “u lodha”; nga ty morëm gjithmonë fjalën e mirë dhe prej teje mësuam se ç’do të thotë të duash, të bësh mirë. E di që nuk t’i them shpesh këto fjalë, që në të vërtet ti e meriton t’i dëgjosh çdo ditë, por dua ta dish sot dhe përgjithmonë që ti je idhulli im. Ti je nëna më e mirë në botë dhe për ty i falenderohem çdo darkë e çdo mëngjes Zotit. Të dua mami!
Afërdita / revistawho.com
