Ato dëshirojnë si të gjithe ne, t’ia thonë çdo ditë nënave të tyre se sa shumë i duan… Por ne u kërkuam që këtë 8 mars t’i thonë fjalë zemre përmes revistawho.com grave më të rëndësishme të jetës së tyre. Ah, ato janë larg dhe kanë ditë e ndoshta muaj pa u përqafuar me mamin. Sot mesazhi i urimit nga ana e vajzave tona të famshme nuk do të bëhet në celular, por do të vijë si një përqafim i ngrohtë nga larg, prej të cilit do të marrin nga pak të gjitha zonjat, e jo vetëm mbretëreshat e tyre. Gëzuar!
Almeda Abazi, bukuroshja e sapo celebruar me martesë në Hollywood të LA, ka shkruar një letër prekëse për nënën e saj në revistawho.com…
Mamushit tim,
E kujtoj si sot kohën kur në vogëli, më pyesnin se çfarë do doja të bëhesha kur të rritesha dhe unë me gjithë dëshirat e pasionet e moshës përgjigjesha: dua të bëhem si mami. Doja të isha TI. Pa qenë ndoshta fare e vetëdijshme për ato që thoja, unë kam dhënë përgjigjen që do të jepja edhe sot. Sepse sot, më shumë se kurrë dua të jem si ti mami.
Dua që edhe unë të jem zemra, shpirti, shoqja e ngushtë, motivimi, inspirimi i fëmijëve të mi, njësoj siç ke qenë ti për mua. Kur njeriu rritet dhe nis të mendojë për të nesërmen, për ditën kur do të bëhet prind, brengën më të madhe e paska me veten: a do mundem dhe unë që të jem po aq e mirë sa nëna ime? Këtë përgjigje nuk besoj se do t’ia jap ndonjëherë vetes mam, ama e di me siguri që e kam njohur modelin ideal për të qenë një nënë, bashkëshorte, grua, një njeri shembullor. Dhe këtë ma ke mësuar ti mami. Ti, që nuk do të mund të të përshkruaj dot kurrë me fjalë. Sepse e tillë je ti, e papërshkrueshme, e papërsëritshme, e paarritshme.
Ti je bota ime! Të dua!
Almeda jote / revistawho.com
