Këngëtarja me origjinë shqiptare Bebe Rexha ka arritur një sukses të jashtëzakonshëm në mbarë botën dhe shumë pak njerëz e njohin me emrin e saj shqiptar, Bleta. Megjithatë siç duket edhe vetë këngëtares i pëlqen të identifikohet më shumë me atë emër që e njohin shumica e fansave. Ditën e sotme ajo ka publikuar në ‘Instagram’ një video, në të cilën shihet teksa ecën në rrugë dikush e pyet si e ka emrin dhe këngëtarja kthehet me disa tullumbace në dorë që lexojnë Bebe. Pas këtij postimi, ish-kapiteni i kombëtares shqiptare Lorik Cana i ka kujtuar Bebes emrin e saj të vjetër, por nuk e ka shkruar saktë. “Do të thuash Blerta?”, – ka pyetur Loriku. Siç duket Bebe e ka vënë re komentin e tij dhe nuk ka ngurruar ta korrigjojë publikisht, duke i treguar se emri i saj është Bleta dhe jo Blerta.
Në shumë pak raste mund të ndodhë që këngëtarja t’ju kthejë përgjigje komenteve, por mesa duket nuk mund të qëndrojë e qetë kur i ngatërrojnë emrin. Megjithatë Loriku nuk është stepur nga përgjigja e Bebes për t’i treguar se sa shumë krenarë janë shqiptarët për suksesin e saj. “Bleta ne jemi krenarë për ty! Shumë”, – i është përgjigjur Loriku. Kujtojmë se Bebe ka publikuar së fundmi këngën “Last Hurrah” që është pritur mjaft mirë nga publiku. /revistawho.com
