Pallati Buckingham ka njoftuar se mbretëresha Elizabeth II është në gjendje të rëndë shëndetësore. Shëndeti i saj ka shqetësuar mjaft mjekët e saj, tha Buckingham Palace në një deklaratë këtë të enjten në mëngjes. “Pas vlerësimit të mëtejshëm këtë mëngjes, mjekët e Mbretëreshës janë të shqetësuar për shëndetin e mbretëreshës dhe kanë rekomanduar që ajo të mbetet nën mbikëqyrjen mjekësore”, thuhet në deklaratë. Një burim mbretëror thotë se janë njoftuar të gjithë familjarët dhe miqtë e afërt të saj. “Lartësia e tyre mbretërore Princi i Uellsit dhe Dukesha e Cornwall kanë udhëtuar për në Balmoral,” tha Buckingham Palace, duke shtuar se Princi William po shkon gjithashtu në Balmoral nga shtëpia e tij në Windsor.
Pas njoftimit të Pallatit Buckingham se mbretëresha Elizabeth II nuk është në gjendje të mirë shëndetësore, Princi Harry dhe Meghan, Duka dhe Dukesha e Sussex, janë rrugës për në Balmoral të Skocisë ku ndodhet 96-vjeçarja. Pas tensioneve dhe mungesës së tyre në eventet familjare, ata do të takohen sërish me familjen në një mënyrë të papritur. Ndërkohë, disa minuta më parë një avion me shtatë anëtarë të familjes mbretërore është ulur në aeroportin e Aberdee.
