Sezoni veror është parajsa e fitimeve për të gjithë artistët shqiptarë, sepse datat e koncerteve janë thuajse të përditshme, e për këtë shkak edhe publikimet e këngëve të reja përqëndrohen në këtë periudhë. Korriku dhe gushti konsiderohen nga të gjithë si muajt e punës intensive, ku ka raste që këngëtarëve u duhet të performojnë edhe në dy a tre ambiente njëherësh.
Po sa janë pagesat për këto koncerte? Nga një komunikim me menaxherët e club-eve, çmimi dysheme për këngëtarët që janë në treg me prodhime të reja është nga 1500 euro – 6000 euro, duke mos lënë mënjanë këtu as ata që janë të rezervuar në dasma e gëzime të tjera familjare. Por nëse do të merrnim një mesatare, 3000 euro për të gjithë artistët e kërkuar, me një llogari të thjeshtë, duke i konsideruar vetëm 50 data koncertesh nga 75 që përfshin sezoni veror, do të arrinim në konkluzionin se fitimet e tyre për një sezon janë 150 mijë euro. Ndoshta dhe më shumë, po që të mos ua prishim të dielën, po ju themi vetëm kaq. Pjesë e kësaj liste, me këto të ardhura janë këngëtarë si: Noizy, Aurela Gaçe, Ledri Vula, Capital T, Flori Mumajesi, Dhurata Dora, Alban Skënderaj, Samanta Karavella, Nora Istrefi, Xhensila Myrtezaj, Kida, Sinan Hoxha, etj. / revistawho.com
