“Met Gala” për vitin 2025 do të jetë “bombë”! Ja cila është arsyeja!

Gala e Met-it, që tradicionalisht mbahet të hënën e parë të majit çdo vit, është një event për mbledhjen e fondeve me një darkë ekskluzive për Muzeun Metropolitan të Artit në New York City.
Duke tërhequr emrat më të mëdhenj të argëtimit, modës dhe sportit, eventi i vitit të ardhshëm më 5 maj po cilësohet si “historik” nga mediat, pasi u zbulua se do të ketë bashkëkryesues vetëm meshkuj me ngjyrë dhe një temë frymëzuar nga stili i burrave me ngjyrë.
Louis Vuitton është sponsori kryesor i ekspozitës dhe Gala-s së Met-it, ndërsa financime shtesë do të vijnë nga Instagrami, Fondacioni Familjar Hobson/Lucas, Dr. Precious Moloi-Motsepe dhe Africa Fashion International, si dhe nga Fondacioni Perry.
Duke iu bashkuar kryeredaktores së Vogue, Anna Wintour, e cila e ka drejtuar eventin që nga viti 1995, do të jenë aktori i “The Color Purple” Colman Domingo, ylli i Formula 1 Lewis Hamilton, reperi A$AP Rocky, këngëtari Pharrell Williams dhe kryetari nderi, ylli i NBA, LeBron James.
Cila është tema?
Çdo vit, eventi feston temën e ekspozitës së Kostumografisë së atij viti, e cila mbahet në Muzeun Metropolitan të Artit.
Këtë vit, Vogue zbuloi se tema do të përputhet me ekspozitën e re të Institutit të Kostumografisë, “Superfine: Tailoring Black Style”, e cila do të jetë në shfaqje nga 6 maji deri më 26 tetor 2025.
“Duke marrë frymëzim nga libri i Monica L. Miller të vitit 2009, ‘Slaves to Fashion’ ekspozita do të paraqesë veshje, piktura, fotografi dhe më shumë, të gjitha duke eksploruar stilin e veçantë të burrave me ngjyrë në kontekstin e dandyizmit, nga shekulli i 18-të deri në ditët e sotme,” shkruan Vogue.
Kjo do të jetë Gala e parë e përqendruar te veshjet për meshkuj që nga “Men in Skirts” në vitin 2003.
Çfarë është dandyizmi i burrave me ngjyrë?
“Dandyizmi” vjen nga fjala “dandy,” që i referohet një personi që kujdeset shumë për veshjen e tij.
Muzeu Met shpjegon se dandyizmi fillimisht iu imponua burrave me ngjyrë në Evropën e shekullit të 18-të, ndërsa tregtia transatlantike e skllevërve dhe një kulturë në rritje e konsumizmit krijuan një trend të shërbëtorëve të “stolisur”.
Duke folur për Vogue, Miller përshkroi dandyizmin e burrave me ngjyrë si “një strategji dhe një mjet për të rimenduar identitetin, për të rishpikur veten në një kontekst tjetër. Për të sfiduar vërtetë kufijtë — veçanërisht gjatë kohës së skllavërisë, për të sfiduar atë që konsiderohet njerëzore dhe e vlefshëme.”