Emisioni ‘Lartë e Poshtë’ nga Eraldo Rexho këtë herë është zhvendosur drejt Durrësit ku janë intervistuar një pjesë e konkurrenteve të ‘Miss Globe’. Ndër to ra në sy ‘Miss Brazil’, e cila quhet Vanesa. Teksa prezanton veten dhe flet për mesazhin që dëshiron të transmetojë, ajo zbulon historinë e jetës së saj. Me dëshirën për ta ndarë me të gjithë duke dashur të tregojë se kurrë nuk duhet të dorëzohesh edhe nëse prek fundin, Vanesa e nis kështu rrëfimin: “Unë kam një histori të gjatë, por e përmbledhur do të ishte kjo: Kur unë linda, im atë ishte një futbollist dhe ne kishim para. Ai ishte i famshëm dhe të gjithë e njihnin për atë që bënte, pavarësisht se në atë kohë nuk kishte media sociale. Por më vonë ai pësoi një aksident dhe nuk mundi të luante më. Nga ai moment gjërat nisën të merrnin për keq, në aspektin financiar, derisa shkuam në një pikë ku nuk kishim çfarë të vishnim. Unë kisha gjithçka dhe në një moment tjetër nuk kisha më asgjë, prandaj nuk e kuptoja çfarë po ndodhte. Kështu që ne shkuam në një vend që në Brazil dhe në botë njihet si “getto” (rruga), një vend shumë i thjeshtë, por edhe tërheqës për turistët.”
Ndërsa në vazhdim ajo zbulon gjithçka me të cilën ju desh të përballej pas problemit që pësoi i ati. “Ajo kohë ishte më e vështira në jetën time. Mu desh të nisja punë kur isha 14 vjeç që të ndihmoja tim atë, ndërsa ime më në këtë situatë na braktisi dhe zgjodhi një jetë tjetër. Tani nuk e gjykoj më, por në atë kohë ishte shumë e vështirë të mos kisha mamin pranë. Gjithsesi kisha babain tim. U përballa me shumë gjëra dhe njoha anën më të keqe të botës. Pash njerëz që vrisnin njëri-tjetrin, pash gjëra të këqija për të cilat nuk jam ende gati të flas, sepse prekem shumë. Në mes të kësaj rrëmuje pash shpresë dhe askush nuk ma tha atë gjë”,- tregon ajo.
Vanesa Zbulon edhe ëndrrën e saj dhe me pak fjalë kërkon të japë një mesazh për të gjithë. “Ëndrra ime më e madhe është të kthehem atje nga ku kam ardhur. Të kthehem tek ato shkolla, ata fëmijë dhe t’iu them që unë besoj tek ëndrrat e mia dhe më shikoni ku jam. Në një vend të mrekullueshëm në anën tjetër të botës. Unë nuk hoqa dorë nga ëndrrat, por luftova fort për to. Dua të bërtas dhe t’ia tregojë njerëzve, t’i bëj të besojnë se nëse kanë shpresë mund të arrijnë gjithçka duke mos devijuar nga rruga e drejtë. Do të duhet pak kohë, por do t’ia arrijnë”,-e mbyll fjalën bukuroshja braziliane. Vanesa, përfaqësuese e Brazilit do të konkurrojë mes vajzave nga i gjithë globi në natën finale të 21 tetorit./revistawho.com
https://www.youtube.com/watch?v=tqvbuK-oyVo
