E bukura është eliksiri i jetës. Përmes saj vërshojnë shtegëtimet në të gjitha anët e botës. Përmes traditës së lashtë për të admiruar të bukurën, u krijua “Miss Shqipëria”, në vitin 1998. Një traditë që vit pas viti u bë më e plotë, më e formësuar. Mes vajzave shqiptare që rrënjosin historinë e të bukurës, “Miss Shqipëria” po shkon drejt plotësimit të 25 viteve traditë. Nga një vend në tjetrin, nga mali në det, nga qyteti në copëzat e fshehura të Shqipërisë, çdo vit është krijuar një panoramë e plotë e së bukurës.
Si çdo vit tjetër, edhe ky vit sjellë risi për kompeticionin e bukurisë. 28 vajza përfaqësojnë bukurinë, ëndrrën, dëshirën për të triumfuar. Prej krijimit të “Miss Shqipëria”, motoja ka qenë e qartë, “një miss, një kala, një histori”, duke ndërthurur në mënyrë perfekte kulturën, trashëgiminë dhe të bukurën. Në mes bukurosheve, do të performojnë për të gjithë pjesëmarrësit, artistët, Adelina Tahiri, Eneda Tarifa, Renis Gjoka, Rovena Dilo, Neki Emra, Devis Xherahu, Inis Neziri, David Dreshaj, Sheila Haxhiraj, Maya Aliçkaj, Endri dhe Stefi Prifti.
Këtë vit e gjithë skena është krijuar në kalanë e Porto Palermos në Himarë, një shkrirje e madhështisë dhe elegancës që do të pasqyrojnë bukuroshet shqiptare. Një vit më parë, ky kompeticion u zhvillua në kalanë e Petrelës, ku triumfoi bukuroshja Lea Islamaj. Në mes të muajit qershor, ajo iu bashkua stafit për të “Miss Shqipëria”, ndërsa më 3 korrik do të dorëzojë kurorën e më të bukurës për pasardhësen e saj të vitit 2022. Kujtojmë se bukuroshja 19-vjeçare e ka nisur karrierën në pasarelat ndërkombëtare, teksa ka qenë pjesë e “ Paris Fashion Week 2022”, duke prezantuar veshjet e Jessica Jane. Modelja gjatë Javës së Modës u zgjodh për sfilatë nga 4 stilistë pjesëmarrës në kompeticion.
Epo, edhe pak orë nga ndajnë nga kurorëzimi i më të bukurës shqiptare për vitin 2022!
