Devi dhe Dori janë dy djemtë e rinj që do drejtojnë programin investigativ të Top Channel, ‘Fiks Fare’. Publiku është njohur me herët me personazhet simpatikë gjatë shfaqjes së tyre në rubrikën “Pa limit” në programin e së dielës të të njëjtit televizion. Në fakt për të gjithë lajmi i ndryshimit të figurave të Fiks-it ishte i papritur. Por jo aq për dyshen. Në një intervistë për “City News” ata tregojnë se janë bërë audicione me disa çifte personazhesh derisa në fund u përzgjodhën. Veç kësaj djemtë kanë edhe një koment për dy ish-moderatorët, Fiori Dardha dhe Gent Pjetri (Doktori). Lexoni më poshtë se çfarë kanë thënë.
Përzgjedhja juaj ishte surprize apo një garë e fituar për drejtimin e ‘Fiksit’?
Devi – Një garë pasi kemi berë disa audicione derisa morëm përgjigjen.
Dori – Ishin rreth 10 çifte dhe mesa duket fituan më të dobtit por më simpatikët.
Ka fjalë se jeni zgjedhur me mik, mund të tregoni pak kë korruptuat?
Devi – Kam çunin e tezes që punon polic dhe ai ka një të dashur që njeh Filipin.
Dori – Kam një teze nga Shijaku e cila jeton në Amerikë, që kur ka qenë adoleshte ja ka lujt Filipit. Dhe ai nuk ja harroi këtë nder.
Cili ishte personi i parë që ju kontaktoi për të drejtuar Fiksin?
Devi & Dori – Na mori një numër anonim, se hapëm në fillim. Pastaj na erdhi një mesazh që thoshte “Hape Idiot”.
Një komenti i juaji për Doktorin dhe Fiorin?
Devi & Dori– Vlerësim për të dy për gjithë punën e tyre, që kanë bërë tek ‘Fiksi’ këto vite.
Velinat?
Devi & Dori – Pse ka velina këtë vit? Ne e dinim që ishim ne velina?! Ju lutem na sqaroni .
Po Filipin si e shikoni?
Filipin e shohim si kapitalist, që shfrytëzon punetorët, siç jemi ne…
Çfarë pritet të sjellë Dori/Devi ndryshe?
Devi – Une kam vendosur të bëj gjoksin, ta kem më televiziv.
Dori – Unë do mbush dhëmballën që të jem më simpatik.
