Para pak ditësh Morena Taraku u nis drejt Shqipërisë, për të parë nga afër situatën pas tërmetit të 26 nëntorit dhe për të ndihmuar familjet më të prekura prej tij. Morena vizitoi ata që ishin plagosur për shkak të tërmetit dhe fëmijët që kishin mbetur të traumatizuar pas asaj ngjarje. Këngëtarja tregoi se historitë e tyre e kishin prekur dhe nuk kishte qarë kurrë aq shumë që nga vdekja e nënës së saj. Pas shumë vizitash dhe ndihmash në terren, Morena është larguar sërish për në Turqi mbrëmjen e djeshme. Këngëtarja ka premtuar se do të vazhdojë të kujdeset për Shqipërinë dhe ka treguar se këto ditë ka qenë mjaft e stresuar dhe e mërzitur. “Faleminderit Shqipëri. Për këto ditë të vështira, por edhe të mbushura me plot dashuri të sinqertë. Unë po kthehem në shtëpi, por nuk do të thotë që po ndalem të qenurit me juve… Jemi në çdo shtëpi dhe brenda 24 orësh vijmë aty ku ju keni nevojë. Unë nuk kam fjetur prej asaj ditës kur kam ardhur, sepse jam shumë e stresuar dhe e mërzitur, ajo ç’ka kam parë dhe dëgjuar këto ditë qofshin të fundit… Më është bërë zemra copa-copa disa herë këto ditë, por vetëm 1 lutje kam të besojmë në të mirën edhe pse ende jetojmë në këtë mjerim. Ju do Morena dhe shihemi shpejt”, ka shkruar Taraku në një postim në ‘Instagram’. /revistawho.com
