Në këtë vit, ku çdo gjë ka ndryshuar, ndryshoi dhe Panairi i Librit. Në mungesë të takimit të madh të përvitshëm, tashmë kemi një aplikacion për blerjet e librave me ulje çmimi, që shkarkohet shumë kollaj. E gjeni në app-store “Panairi i Librit” dhe është gjëja më e thjeshtë në përdorim, ka të rreshtuara gjithë shtëpitë botuese shqiptare, ku mund të zgjidhni librat tuaj. Pagesën e bëni kur të mbërrijnë në shtëpi, vetëm një ditë më pas. Por mund të zgjidhni dhe Librarinë Adrion, që këto ditë në shkallët e Pallatit të Kulturës ka organizuar një “mini panair”, ku mund të blini libra në shqip dhe në gjuhë të huaj me ulje fantastike. Keni dhe librarinë Bookland, në ETC: e sapo hapur, në katin e tretë, ka dhe një ballkon dhe gjatë gjithë nëntorit aty zhvillohen takime me shkrimtarë dhe përkthyes, ku blerësit mund t’i marrin librat me autografë në kushtet maksimale të sigurisë për shëndetin. Sigurisht dhe këtu gjatë gjithë nëntorit me ulje çmimi.
Për ta bërë më të thjeshtë zgjedhjen, ne të revistës “Who” kemi menduar t’ju vijmë në ndihmë me “shportën e Panairit të Librit”, duke bërë çdo ditë zgjedhjet tona, që mund të jenë dhe tuajat. Na ndiqni!
Një botim i ri
“Fate dhe shtrëngata”
Lauren Groff
Botimet “Dudaj”
“Çelësi i një martese nuk është e vërteta, por sekreti”, do mjaftonte kjo fjali që libri të kthehej në një magnet për shumë lexuese. E megjithatë, është më shumë sesa kaq, nuk është një libër – telenovelë për gra, por romani i vlerësuar si më i miri i vitit nga Barack Obama, kurse aurorja Groff ka marrë bekimin e vetë Stephen King. “Një nga kënaqësitë që të ofron ky libër janë të papriturat. Lauren Groff di si ta shndërrojë çdo fjali në një uragan të vogël”, ka shkruar “The New York Times”. Dhe na mjaftojnë kaq arsye për ta zgjedhur dhe për t’i dhuruar vetes një lexim të mirë.
Një për të na kthyer poezinë
“Ndjenja e kohës”
Giuseppe Ungaretti
Botime “Pegi”
Një poezi e mirë ndonjëherë ka peshë sa disa romane bashkë. Ata që ende nuk e kanë humbur poezinë në jetën e tyre, e kanë festë botimin në shqip të këtoj vëllimi, përkthyer nga Aida Baro. Ungaretti është një prej poetëve më të mëdhenj italianë të shekullit XX dhe njihet si njeriu që hodhi themelet e hermetizimit, një rrymë letrare që solli një tjetër frymë dhe formë në mënyrën e të krijuarit poezi. “Ndenja e kohës” është vëllimi i tij i dytë poetik dhe temat që rrok në këtë vëllim nisen nga njeriu, nga jeta si mister.
Një për ata që nuk duan letërsi
“Sapiens. Një histori e shkurtër e njerëzimit”
Yuval Noah Harari
Botart
Njëqind mijë vjet më parë të paktën gjashtë lloje humanësh popullonin botën. Sot është vetëm një. Ne! Homo sapiens-i. Si ia doli lloji ynë të fitonte betejën për të dominuar mbi të tjerët? Pse u bashkuan paraardhësit tanë foragjerë për të krijuar qytete dhe mbretëri? Si ia dolëm të besojmë në perëndi, kombe dhe të drejtat e njeriut; të besojmë paranë, librat dhe ligjet; dhe të skllavërohemi nga burokracia, oraret dhe konsumerizmi? Si do të jetë bota jonë në mijëvjeçarin që vjen? Profesori Yuval Noah Harari te “Sapiens” përmbledh gjithë historinë njerëzore. I guximshëm, gjithëpërfshirës dhe ngacmues, Sapiensi harmonizon historinë dhe shkencën për të sfiduar çdo gjë që mendonim se dinim rreth të qenit njeri: mendimet, veprimet, trashëgiminë dhe të ardhmen tonë.
