Jeta e Johnny Depp ka qenë e mbushur me sfida të mëdha, që nga fëmijëria e dhunshme e deri te përballja publike me akuzat e ish-bashkëshortes Amber Heard, të cilat ndikuan thellësisht në karrierën dhe jetën e tij personale.
Në një intervistë të fundit për The Telegraph, aktori 62-vjeçar foli hapur për marrëdhënien e ndërlikuar me nënën e tij, Betty Sue Palmer, e cila ndërroi jetë në vitin 2016. Ai e përshkroi atë si “të paparashikueshme, agresive dhe shpesh të dhunshme”, duke kujtuar momentet kur ajo e dhunonte fizikisht.
“Ajo më godiste me një shkop të mallkuar, me këpucë, me tavëll duhani, me telefon, nuk kishte rëndësi,” rrëfeu aktori.
Megjithatë, Depp thotë se kjo përvojë e dhimbshme ka shërbyer si mësim për mënyrën se si ai vetë është sjellë si prind.
“Por e falënderoj për këtë. Ajo më mësoi se si të mos i rrisja fëmijët e mi. Të bëja pikërisht të kundërtën e asaj që ajo bëri me mua.”
Aktori, që ka dy fëmijë me këngëtaren franceze Vanessa Paradis, është shprehur edhe më parë për fëmijërinë e tij traumatike, veçanërisht gjatë padisë për shpifje kundër Amber Heard, në të cilën mohoi akuzat për abuzim.
Përveç luftës personale, Depp kujton edhe momentin kur u largua nga universi i “Fantastic Beasts”, një goditje tjetër pas shpërthimit të skandalit publik me Heard.
“Ndërsa po bëja filmin, ata më thanë: ‘Duam që të largohesh.’ Por, ajo që ata donin vërtet, ishte që unë të hiqja dorë nga aktrimi.”
Aktori tregoi se ndonëse ndihmoi shumë njerëz në jetën e tij, disa prej tyre e braktisën në momentet më të vështira. Ai përmendi konkretisht tre miq të ngushtë që, sipas tij, e tradhtuan:
“Ajo që më dhemb më shumë është se tre persona që ishin në festat e fëmijëve të mi dhe i hidhnin në ajër më tradhtuan,” tha ai. “I kuptoj ata që nuk më qëndruan pranë, sepse gjëja më e frikshme për ta ishte të bënin gjënë e duhur.”
Një tjetër zhgënjim i madh për të ishte ish-menaxherja e tij, Tracy Jacobs, me të cilën kishte bashkëpunuar për 30 vite. Ajo jo vetëm që u largua, por edhe dëshmoi kundër tij në gjyq, duke deklaruar se studios e kishin të vështirë ta punësonin për shkak të sjelljes së tij në xhirime.
Sot, pavarësisht gjithçkaje, Johnny Depp thotë se vijon të mbrojë artin e tij dhe të luftojë për të vërtetën:
“Unë vazhdoj të luftoj, pavarësisht plagëve të së kaluarës.”
