Sydney Sweeney po vazhdon të forcojë pozitat e saj në Hollywood, duke ndërtuar një karrierë që po konsiderohet nga më të suksessshmet e brezit të ri. Ajo ka spikatur jo vetëm për cilësinë e projekteve ku merr pjesë, por edhe për sasinë e roleve të saj të rëndësishme në industrinë kinematografike.
Së fundmi, emri i saj po përflitet për një nga rolet më të kërkuara në botën e filmit: një rol në filmin e ardhshëm të James Bond. Pas largimit të Daniel Craig nga kjo sagë e famshme britanike, vëmendja është përqendruar tek zëvendësuesit – por duket se më shpejt se agjenti 007, është përzgjedhur “vajza e Bond-it”.
Sipas raportimeve nga media britanike The Sun, regjisori Denis Villeneuve, i cili thuhet se do të marrë drejtimin e filmit të ri, është shumë i interesuar që Sydney Sweeney të jetë pjesë e kastit si vajza e re e Bond. Lidhja e tyre profesionale është e ngushtë, dhe duket se Sweeney ka edhe një tjetër mbështetës të fuqishëm në këtë proces – Jeff Bezos. Biznesmeni miliarder dhe drejtuesi i Amazon, që gjithashtu është mik personal i aktores, ka treguar hapur afërsinë me të, përfshirë edhe ftesën për në dasmën e tij.
“Sydney është emri kryesor në listën e aktorëve për Bondin”, tha një burim për The Sun. “Ajo ka cilësinë e të qenit atletike dhe e aftë të bëjë skena fizike, si dhe të jetë femërore dhe të ndjekë trashëgiminë e vajzave të Bondit.”
Me interesimin në rritje dhe mbështetjen nga figura kyçe në industrinë e filmit, mbetet për t’u parë nëse Sydney do të bëhet fytyra e re që do të shoqërojë agjentin legjendar në misionin e tij të radhës.
