Aktori i ri, Igli Zarka ka tërhequr vëmendjen me rolin e tij në “Equus” ku u shfaq nudo në një shfaqje për herë të parë. Shfaqjen e Iglit e ka pëlqyer edhe Albatros Rexhaj i cili i ka kushtuar një shkrim aktorit duke e quajtur atë një yll të lindur. Më poshtë mund të lexoni shkrimin e plotë.
“A star has been born!
Dhe ky është aktori i ri Igli Zarka, që debutoi fuqishëm me rolin e Piterit në shfaqjen “Equus”. Fatkeqësisht, për javë të tëra, theksi publik ra te dy episodet e shkurtra kur Piter, tërësisht lakuriq, zotëron skenën. Ky diskurs tregon se vazhdojmë të jemi një shoqëri arkaike dhe se komuniteti i medias ka shumë pak ndjesi për atë çka vërtet është teatri. “Equus” nuk është pornografi dhe rrjedhimisht zhveshja e Iglit nuk përbën lajm, por është thjesht një detaj narrativ përgjatë zhvillimit të konfliktit dhe intrigës dramatike. Ndërkaq, dhe kjo duhet thënë qartë, guximi i Iglit për të aktruar nudo nuk e amniston atë nga disa elemente të tjera, shumë të rëndësishme.
Qëndroj fuqishëm prapa fjalisë së parë: Igli Zarka tashmë është yll. Megjithatë, me dashamirësinë më të madhe, si profesionistë të fushës dhe artdashës, duhet pyetur nëse, pos lojës të bukur me aktin e zhveshjes, Igli ia arriti të na tregonte diçka tjetër të veçantë? Sa ishte i suksesshëm në përçimin të dramës emocionale dhe psikologjike që çdo sekondë zhvillohet brenda Piterit apo, hiç skenat e zhveshjes, Igli ishte pothuajse i njëtrajtshëm? Sa ishte në koherencë artistike me pjesën tjetër të kastit apo ishin të tjerët që, me lojën e tyre, e mbulonin dhe e fuqizonin Iglin?
Përgjatë kësaj periudhe të pushimit, përgjigjet në këto pyetje do të duhej të ishin material reflektimi, si për Iglin ashtu edhe për pjesën tjetër të ekipit, dhe mbase edhe të korrigjohen kur shfaqja të rikthehet në repertor gjatë muajit qershor. Jam shumë i bindur se publiku do të vazhdojë të vijë rrëke, jo për nudon e Iglit, por për të parë një shfaqje të bukur, që mund të bëhet edhe më e fuqishme. (A.R)”
