25 mijë euro shpenzime, 350 të ftuar, 3 fustane dhe një ceremoni. Detajet e pazbuluara nga dasma e çiftit simpatik të showbiz-it
E martë, 2 shtator, ora shënon 14:20 dhe ne sapo kemi mbërritur në “Hotel Emerald”, ku do të mbahet në mbrëmje dasma e Nora Istrefit me Robert Berishën. Ky i fundit, është i pari person që takojmë sapo hyjmë në hotel. Mban një bllok në dorë dhe diç shkarravit aty, ndërkohë që na tregon se gjithçka është gati për sonte. Ka zgjedhur të merret vetë me të gjitha, ndaj edhe kjo orë nuk e gjen në shtëpi, por në krye të detyrës, duke ndjekur përgatitjet… “Nora po pushon pak, se sot do të jetë një natë e gjatë”, – na thotë, ndërsa rrudh ballin për motin aspak të mirë në Prishtinë. Një zile telefoni ndërpret bisedën dhe Roberti i drejtohet me shpejtësi sallës ku do mbahet dasma. E ndjekim edhe ne nga pas, për të shuar kuriozitetin që na shoqëron që prej nisjes. Salla duket sikur do të marrë flakë nga e kuqja e gjakut që mbizotëron në ndriçim. Tavolinat janë veshur me mbulesë të zezë, njësoj si karriget. Mbi tryezë qëndrojnë të renditura me kujdes serviset e ar gjendta, që të evokojnë imazhin e një dasme klasike, deri diku mbretërore. Lulet janë element i pashmangshëm i arredimit; një ndërthurje mes së kuqes dhe së bardhës na çon për pak në një tjetër botë. Për zbukurimin e ambientit është kujdesur “Finesë”, një agjenci e njohur në Kosovë, e cila gjatë këtij viti ka kuruar disa nga dasmat e rëndësishme në Kosovë (si ajo e Lorik Canës). E ndërsa ne pyesim pa pushim mbi detajet e arredimit Vesa Gashin, drejtuesen e “Finesë”, provat e orkestrës thyejnë pëshpërimat tona. Tiktaket e orës sakaq po rrahin shpejt, e bashkë me të edhe zemrat e dy protagonistëve të mbrëmjes…
Të ftuarit
Ora 20:00 gjalloi atmosferën në ambientet e “Emerald”, sepse të ftuarit e përzgjedhur ishin aty. Me një gotë vere të bardhë, mysafirët e Norës dhe Robertit dukeshin njëri më klas se tjetri. Pjesëmarrja e personazheve publike ishte e pritshme në këtë ceremoni. Emra të njohur të muzikës shqiptare, si: Jehona Sopi, Sinan Vllasaliu, Adrijan Gaxha, Ledri Vula, ministri i Kulturës së Kosovës Memli Krasniqi (dikur këngëtar), Ermal Fejzullahu, Shyhrete Behluli, Lumi B, Gili etj., ishin aty për të nderuar çiftin e ri të bashkëshortëve në këtë ditë të shënuar të jetës së tyre. 350 ishin dasmorët që bënë “gëzuar” bashkë me Norën e Robertin, duke u uruar atyre jetë të lumtur…
Hyrja e çiftit në sallë, ishte e thjeshtë dhe madhështore. Ndërsa të ftuarit u ngritën në këmbë dhe i pritën me duartrokitje, një muzikë ritmike e krejt moderne kumboi në sallën gjigante. Dhëndri dhe nusja kishin zgjedhur të mos ishin tradicionalë, duke u bërë të veçantë në ditën e tyre më të rëndësishme.
Menuja
Menuja e dasmës, ishte menuja e parë që ofronte hoteli ku u mbajt ceremonia, dhe në të përfshiheshin: antipastë e ftohtë, sallata, pjata kryesore (që kishte disa lloje mishi + perime e oriz), si dhe ëmbëlsira. Vera, shampanja dhe të tjera pije alkoolike e freskuese, ishin përgjatë gjithë mbrëmjes në shërbim të të ftuarve. Në secilën prej tavolinave qe vendosur një kuti, brenda së cilës qe shkruar thënia e Aristotelit: “Dashuria është e përbërë nga një shpirt i vetëm që jeton në dy trupa” dhe një çokollatë në formë zemre.
Spektakli
Emra të njohur të muzikës ishin prezentë në ceremoninë madhështore, por ata nuk mund të mbeteshin jashtë listës së artistëve që do të këndonin. Kështu, Ymer Bajrami dhe Sinan Vllasaliu ishin angazhuar për të kënaqur dasmorët me muzikë popullore. Pas tyre, Andrea, një këngëtare nga Maqedonia, ofroi për të gjithë të pranishmit ritme latine. Muharrem Ahmeti, këngëtari i muzikës tallava, ishte gjithashtu i ftuar për të argëtuar dasmorët. Si qershia mbi tortë në gjithë këta emra qëndronte Era Istrefi, motra e Norës, e cila performoi këngën e saj hit, “E dehun”. Pas saj, dhëndri erdhi me një dedikim të veçantë për gjysmën e tij më të mirë, Norën.
Veshjet
Eh, veshjet! Tek ato përqendrohet gjithë vëmendja, sepse, pa dyshim që janë pjesë e rëndësishme e eventeve. Të gjithë ishim sy e veshë nga fustani i nuses dhe mund të themi me bindje që Nora shkëlqeu nën të bardhën e stiluar aq bukur nga Valdrin Sahiti. Tri fustane ishin dizenjuar enkas për Norën dhe atë natë, por nusja zgjodhi që për efekt kohe të vishte vetëm dy prej tyre. Kaci Lleshi dhe Vjosa Metaj, ishin ata që u kujdesën për imazhin e Norës, e cila ndriçonte në çdo sekondë. Po nuk mbeti më pas as dhëndri; i veshur me një kostum “Armani” dhe këpucë “Louboutin”, Roberti ishte fiks princi i ëndërruar në përrallën e jetës së Norës.
…dhe kështu, ata të dy jetuan të lumtur e të dashuruar përgjithmonë, si në çdo përrallë.
Shpenzimet
Ndonëse çiftit nuk i pëlqeu të fliste për këtë pjesë, ne të “Who” zbuluam përmes stafit që u mor me organizimin e ceremonisë, se shpenzimet për të kapnin shifrën e 25 mijë eurove.
Nga Eraldo Rexho / Fotot: Geljant Kaleci
Discussion about this post