Shakira duket se është sërish në telashe. Mediat e huaja raportojnë se një gjykatës në Barcelonë ka hapur një hetim të dytë për mashtrimin e dyshuar tatimor nga këngëtarja.
“Një gjykatës në periferi të Barcelonës ka hapur një hetim bazuar në një ankesë të paraqitur nga prokurorët kundër këngëtares Shakira për dy akuza të dyshuara, të mashtrimit fiskal në vitin 2018”, tha në një deklaratë zyra e shtypit e Gjykatës së Lartë të Drejtësisë së Katalonjës.
Sipas CNN, Shakira tashmë është në pritje të gjykimit për evazion të dyshuar fiskal prej 16.2 milionë dollarësh për vitet 2012, 2013 dhe 2014.
Ajo më herët mohoi akuzat për mashtrim tatimor në lidhje me periudhën 2012-2014 përmes firmës së saj të marrëdhënieve me publikun. Ajo është shprehur se ka vepruar gjithmonë në përputhje me ligjin dhe nën drejtimin e ekspertëve më të mirë të taksave.
Në korrik të vitit 2021, një gjykatës në Barcelonë vendosi që këngëtarja mund të dalë në gjyq për evazion fiskal.
Gjykatësi Marco Jesús Juberías argumentoi se Shakira jetoi më shumë se 200 ditë në Spanjë në secilin prej këtyre tre viteve, duke e bërë atë të detyruar të paguajë taksat në vend.
Në atë kohë, media spanjolle raportoi se ekipi i Shakira-s argumentoi se rezidenca e saj kryesore ishte në Bahamas. Por mediat lokale raportuan se ajo kishte një shtëpi në zonën e Barcelonës me ish-partnerin e saj, Gerard Piqué. Pique dhe Shakira, të cilët kanë dy fëmijë së bashku, njoftuan ndarjen e tyre në qershor të vitit të kaluar
Gjykatësi argumentoi se Shakira dhe një këshilltare financiare, e përmendur gjithashtu në vendim, përdorën një sërë kompanish “off shore” të parajsave fiskale për të fshehur burimet e të ardhurave.
