José Aleixo Duarte Azevedo, shoferi i kamionit që publikoi pamjet dramatike të aksidentit tragjik ku humbën jetën futbollisti i Liverpoolit, Diogo Jota, dhe vëllai i tij, Andre Silva, është vënë në qendër të kritikave për veprimet e tij në vendngjarje.
Azevedo u akuzua se në vend që të ndihmonte të përfshirët në aksident, zgjodhi të filmonte Lamborghinin që kishte marrë flakë. Por në një video për median portugeze Correio da Manhã, ai ka dhënë versionin e tij, duke u përpjekur të sqarojë çfarë ndodhi në ato momente dramatike.
“E kam filmuar zjarrin kur po kalonim pranë vendit dhe disa metra më tutje u ndala, mora fiksen e zjarrit dhe u përpoqa ta shuaja, por për fat të keq nuk munda të bëj asgjë. Ndërgjegjja ime është e pastër,” deklaroi Azevedo.
Ai shtoi se në vendin e ngjarjes ndodhej edhe një shofer tjetër portugez, dëshmitar okular i aksidentit, i cili kishte parë momentin kur makina kishte dalë nga rruga.
Azevedo gjithashtu mohoi zërat se Lamborghini kishte qenë duke lëvizur me shpejtësi të lartë. “Familja më ka thënë se nuk po ecte shpejt. Ishte një rrugë shumë e errët dhe e papërshtatshme. Unë e dallova markën dhe ngjyrën e makinës kur më kaluan, rreth pesë minuta para aksidentit. Po ngisnin shumë qetësisht,” tha ai.
Ngjarja ka tronditur opinionin publik në Portugali dhe në botën e futbollit, ndërsa hetimet për shkaqet e aksidentit vijojnë. Reagimi i Azevedos vjen në një përpjekje për të sqaruar qëllimet e tij në një moment tragjik që i ka prekur të gjithë thellësisht.
