“O Berat ç’i pate fat”, kështu e nis Majlinda Bregu soditjen në qytetin e njëmijë e një dritareve. Soditje që mbyll retreat-in 2-ditor të RCC-së. Prej vitesh zonja Majlinda Bregu mban rolin e Sekretares së Përgjithshme të Këshillit të Bashkëpunimit Rajonal dhe bashkë me ekipin e saj kanë zgjedhur Shqipërinë, Durrësin e Beratin për të diskutuar e analizuar punët e shumta që janë bërë dhe sigurisht ato që priten të bëhen kohë pas kohe.
Vetë Bregu, në një postim në “Instagram” ka theksuar se fryma e grupit është shumë e rëndësishme për të realizuar projektet vizionaret, që synojnë lehtësimin e jetës së qytetarëve, jo vetëm në Shqipëri por në gjithë vendet e Ballkanit Perëndimor siç janë Balkathon-i, Samiti Digjital në Sarajevë, Samiti i Procesit të Berlinit në Tiranë, nismat e shumta për krijimin e Tregut të Përbashkët Rajonal, agjenda e gjelbër, projektet për fuqizimin e grave dhe së fundmi, por jo më pak e rëndësishme, ajo që na intereson e na ndikon të gjithëve në xhepin tonë, reduktimi (një lajm tashmë i shpallur) i çmimeve të “roaming”, ndërmjet rajonit tonë dhe vendeve të BE-së që pritet të nisë nga 1 tetori i këtij viti.
Kështu që e kanë hak që këndojnë e gëzojnë…se sezon i ngarkuar i pret.
Një mbyllje siç i ka hije e një fillim me frymëzim si në sokakët e Beratit, për një vjeshtë të artë…
