Pas deklaratave të forta të princit Harry në një intervistë për BBC, ku ai kërkoi publikisht një pajtim me familjen mbretërore, pallati Buckingham ka reaguar përmes një deklarate zyrtare, duke komentuar mbi vendimin gjyqësor që lidhet me çështjen e sigurisë së tij në Mbretërinë e Bashkuar.
Një përfaqësues i pallatit tha: “Të gjitha këto çështje janë shqyrtuar në mënyrë të përsëritur dhe me kujdes nga gjykatat, me të njëjtin përfundim të arritur në secilin rast.”
Princi Harry u shpreh gjatë intervistës se ishte “i shkatërruar” nga humbja në gjykatë dhe se nuk po komunikon me babain e tij, Mbretin Charles. “Nuk e di se sa kohë i ka mbetur babait tim,” tha ai, duke theksuar se nuk dëshiron më përplasje dhe është i gatshëm për pajtim.
Princi foli për BBC News në Kaliforni pasi humbi një apel mbi nivelet e sigurisë që ai dhe familja e tij kanë të drejtë të gëzojnë ndërsa ndodhen në Mbretërinë e Bashkuar.
“Do të doja shumë pajtimin me familjen time. Nuk ka kuptim të vazhdojmë të luftojmë më, jeta është e çmuar”, tha Princi Harry, i cili tha se mosmarrëveshja për sigurinë e tij “kishte qenë gjithmonë pika e ngërçit”.
Duke thënë se ndihej i “zhgënjyer”, ai e përshkroi humbjen e tij në gjykatë si një “thurje të mirëfilltë të establishmentit të vjetër” dhe fajësoi Familjen Mbretërore për ndikimin në vendimin për të zvogëluar sigurinë e tij.
I pyetur nëse i kishte kërkuar Mbretit të ndërhynte në mosmarrëveshjen për sigurinë, princi Harry tha: “Unë nuk i kërkova kurrë të ndërhynte – i kërkova të largohej dhe t’i linte ekspertët të bënin punën e tyre.”
Ky qëndrim përfaqëson një tentativë për të rifituar lidhjet me familjen mbretërore, ndërkohë që deklarata e tij ka ngjallur reagime të shumta në publik.
