Regjisori i njohur, Kristian Koroveshi, ishte i ftuar ditën e sotme në programin e mëngjesit “Rreze Dielli”. Gjatë intervistës së zhvilluar ai zbuloi shfaqjen e re që do realizohet mbrëmjen e sotme. “Mbrëmë i përshpërita një ylli”, është shfaqja poetike që do të luhet në orën 19:00 në Qendrën Kulturore të Katedrales Ortodokse në Tiranë. Kjo shfaqje do t’i dedikohet dashurisë e cila do interpretohet nga një kast aktorësh të talentuar përfshirë këtu Luiza Xhuvanin dhe Ndriçim Xhepën. Megjithatë, si për t’u shtensionuar para shfaqjes, regjisori i ri ‘u vu në provë’ nga gazetarja Suada Daci. Atij iu kërkua të përshkruajë me një fjalë një pjesë të aktorëve dhe regjisorëve më të njohur shqiptarë. “Luiza Xhuvani aktore e rrallë, Margarita Xhepa ikonë, Roza Anagnosti dashuri e madhe, Rajmonda Bulku e shkëlqyer, Ndriçim Xhepa thjesht ndriçim, Timo Flloko profesor, kurse Vera Grabocka është thjeshtë Vera Grabocka, është institucion më vete”, ka thënë Kristiani. Por kë zgjedh ai mes çiftit Vera Grabocka-Timo Flloko? “Të dy janë dimensione të ndryshme por të dy të pakrahasueshëm dhe simbole të punës”, thotë regjisori, duke mos dashur të bëjë diferencime mes tyre. Duke marrë parasysh artistët që do marrin pjesë, pritet që shfaqja të jetë e suksesshme dhe të vlerësohet nga publiku shqiptar.
