Për herë të parë një vend i Bashkimit Evropian(Spanja) ka miratuar ligjin për “lejen menstruale”.
Me këtë ligj, qeveria spanjolle synon të thyejë tabutë e vendosura prej shekujsh.
Me këtë ligj “ndërprerja e punës për një grua për arsye menstruacionesh”, e lidhur, p.sh., “me patologji të tilla si endometrioza” do të “njihet si një gjendje e veçantë e paaftësisë së përkohshme” për punë.
Ligji u miratua me 185 vota pro, 154 kundër dhe 3 abstenime. Sakaq, “leja menstruale” shkaktoi rezerva te socialistët dhe u kritikua edhe nga sindikata e UGT-së.
Kjo sindikatë e lidhur me socialistët, një nga dy më të mëdhatë në vend, ka shprehur kryesisht shqetësimin se ligji mund të veprojë si frenim për punësimin e grave.
Nga ana e saj, Partia Popullore Konservatore (PP), partia më e madhe opozitare, paralajmëroi rrezikun e “margjinalizimit” dhe “stigmatizimit” dhe të “pasojave të mundshme negative në tregun e punës” për gratë.
Spanja bëhet vendi i parë në Evropë dhe një nga të paktët në botë që e përfshin këtë masë në legjislacion.
Në botë leja menstruale aktualisht ofrohet vetëm në një numër të vogël vendesh, duke përfshirë Japoninë, Tajvanin, Indonezinë, Korenë e Jugut dhe Zambinë.
Projektligji do të ulë gjithashtu TVSH-në për produktet e higjienës femërore në dyqane dhe do t’i bëjë produktet e periudhës të disponueshme falas në shkolla dhe qendra arsimore.
