Lentet e kontaktit janë burim i sigurt infeksioni për syrin në qoftë se nuk ndiqni këshillat e mjekut okulist. Përdorimi i lenteve të kontaktit në fillim është një siklet më vete, por me kalimin e kohës bëhet pjesë e rutinës tuaj të përditshme. Më poshtë po ju listojmë disa këshilla sesi të kujdeseni për lentet e kontaktit Lani duart mirë përpara se ti vendosni – Duart duhet të jenë sterile në momentin që do të vendosni lentet e kontaktit për të shmangur çdo lloj infeksioni që mund të merret. Jo thonj të gjatë – Përdorimi i lenteve kërkon thonj të shkurtër pasi ata janë mbartës të papastërtive dhe burim i sigurt infeksioni. Thonjtë e gjatë gjithashtu mund ta dëmtojnë lenten. Mos i mbani më shumë se 10 orë- Mbajtja e lenteve më shumë se dhjetë orë në ditë është e dëmshme për syrin tuaj. Kjo për shkak të kontaktit të drejtëpërdrejtë me të. Mbajtja e saj për një kohë shumë të gjatë nuk e lejon syrin të marrë ajër dhe e lodh. Hiqini kur flini- Sa herë që flini duhet t’i hiqni lentet. Edhe në drekë në qoftë se merrni një sy gjumë, vendosini lentet në kontenierin e tyre të mbushur me solucion për t’u lubrifikuar dhe dezinfektuar . Sy të acaruar? Mos i përdorni. – Në qoftë se i keni sytë e skuqur apo me sklepa, hiqini lentet në mënyrë të menjëhershme pasi situata e syrit mund të përkeqësohet. Të njëjtat këshilla vlejnë edhe për lentet kozmetike me ngjyrë, të cilat përdoren për një periudhë më të shkurtër. /revistawho.com
