Liverpool ka njoftuar një seri homazhesh prekëse për të nderuar kujtimin e ish-sulmuesit të tyre, Diogo Jota, i cili humbi jetën tragjikisht në një aksident automobilistik në Spanjë, tre javë më parë.
Gjatë gjithë sezonit të ri të Premier League, skuadra e “The Reds” do të mbajë një emblemë të veçantë me mbishkrimin “Përgjithmonë 20”, në nder të numrit të fanellës që mbante Jota. Kjo emblemë do të jetë e pranishme në fanellat dhe xhaketat e lojtarëve, si simbol i përhershëm i dashurisë dhe respektit për futbollistin e ndjerë.
Klubi gjithashtu ka bërë të ditur se përpara ndeshjes hapëse të sezonit kundër Bournemouth, më 15 gusht, në Anfield do të mbahet një minutë heshtje në nderim të Jotës.
Prej momentit kur u bë publike vdekja e tij, mijëra tifozë janë mbledhur jashtë stadiumit Anfield për të vendosur lule, shaje, fanella dhe suvenire, si një shenjë e dhimbjes kolektive dhe kujtimit të një lojtari të dashur.
Klubi ka ndërmarrë një nismë simbolike për këto kujtime: lulet do të kompostohen dhe do të përdoren për të zbukuruar hapësirat në Anfield, Qendrën e Trajnimit AXA dhe në Melwood. Ndërsa sendet e tjera do të riciklohen për ndërtimin e një skulpture përkujtimore që do të vendoset në stadium, duke krijuar një vend të përhershëm kujtese për Diogo Jotën.
Ky gjest prekës tregon se, për Liverpoolin dhe tifozët e tij, Jota do të jetë gjithmonë një pjesë e pandashme e historisë së klubit – Përgjithmonë 20.
