Në një intervistë të sinqertë për mediat argjentinase, Uanda Nara është rrëfyer për herë të parë me detaje rreth periudhës kur mori në dorë menaxhimin e karrierës së Mauro Ikardit — një vendim që, sipas saj, askush nuk e mori seriozisht në fillim.
“U përfshiva në diçka që nuk duhej të përfshihesha, në negociata me burra në futboll,” – ka rrëfyer ajo. “Të vendosnin në një pozicion ku fillimisht të nënvlerësonin. M’u desh të merrja timonin e një barke e cila në ato momente nuk po shkonte askund.”
Uanda kujton momentin kur vendosi të vepronte vetë, duke marrë rolin e menaxheres së burrit të saj të atëhershëm:
“Më kujtohet që mora telefonin dhe u thashë: ‘Tani do negocioni me mua’. Duhet të kenë thënë ‘po kjo idiotja, po si ia mban të telefonojë? Mirë, mirë se e rregullojmë’.”
Por rezultati i guximit të saj foli vetë. “Sigurova një kontratë tre herë më të lartë se ajo për të cilën po punonte menaxheri dhe me të cilin nuk e arrinin atë shifër,” tregon Nara, e cila shton se në atë moment vendosi edhe një kusht të veçantë: “Atëherë u thashë që dua edhe shiritin e kapitenit. Dua këtë, dua atë, dua atë gjënë tjetër…”
Për shumëkënd, kërkesa për shiritin e kapitenit mund të tingëllonte e çuditshme, por ajo kishte një arsye të qartë: “Mua më nevojitej për të bërë negociata me një sponsor, pasi ishte kapiteni më i ri në moshë dhe kishte siguruar shiritin në kaq pak kohë. Dhe për të gjitha këto mendova unë,” – përfundon ajo.
Sot, Uanda Nara shihet si një nga figurat më të forta femërore në botën e sportit dhe showbiz-it, një grua që përballoi stereotipet e një industrie mashkullore për të provuar se “idiotja” e dikurshme dinte të bënte lëvizjen më të zgjuar të karrierës së Mauro Ikardit.
