‘Portokalli’ është spektakli i parë i përjavshëm i humorit në Shqipëri. Ai nisi transmetimin në vitin 2004 dhe që prej atij viti nuk është ndërprerë për asnjë sezon televiziv. Ndër vite shumë janë larguar dhe i janë bashkuar spektaklit të humorit. Edhe ‘Portokalli’ si çdo program televiziv ka ndryshuar me kalimin e viteve skenografinë, aktorët apo mënyrën e trajtimit të skeçeve, por vazhdon të mbetet spektakli më i ndjekur i të dielave mbrëma.
Pas 14 vitesh edhe prezantuesit nuk janë më të njëjtët, por i mbani mend cilët ishin figurat e para të cilave ju besua drejtimi i programit humoristik?
Në vitin 2004 për herë të parë pamë në transmetim Agron Llakajn dhe Ornela Bregun të cilët drejtuan spektaklin së bashku për një vit.
Në vitin 2005 partnerja e Agronit u bë Amarda Toska e cila së bashku me aktorin e humorit e drejtoi spektaklin deri në vitin 2010.
Gjatë këtyre 5 viteve, nga 2005-a deri në 2006-ën, dyshes së dashur për publikun ju bashkua edhe Xhemi Shehu.
Në vitet 2011 deri në 2015 moderatorë të ‘Portokalli’ ishin Salsano Rrapi dhe këngëtarja Eneda Tarifa, por në 2015 rikthehet Xhemi Shehu, me të cilën dyshja e lartpërmendur prezanton për një sezon.
Prej vitit 2016 deri sot Xhemi dhe Salsano drejtojnë me profesionalizëm programin e të dielës. Jo rrallë herë gjatë gjithë viteve të transmetimit të spektaklit, moderatorëve u janë besuar skeçe të ndryshme, duke na zbuluar aftësitë në aktrim./revistawho.com
