Në mbrëmjen e kësaj të premteje që lamë pas, konkurrentët e “DWTS” rrëfyen momente të vështira të jetës dhe njëra prej tyre ishte Enxhi Nasufi. Ajo rrëfeu divorcin e prindërve, përjetimet e saj dhe faktin se janë bërë bashkë pas 20 vjetësh për ta parë të bijën në skenë.
“Kam pasur divorcin e mamit e babit dy herë. Ngjarje të caktuara në moshë aq të vogël të shkaktojnë vështirësi. Zënkat, të bërtiturat, sot nuk i duroj dot zhurmat. E kam ndjerë mungesën e babait. Ndonjëherë mërzitem kur më thonë je si çun. Mua më është dashur të jem si çun. Me vetëdijen time i kam falur. Me koshiencën time nuk i kam vënë askujt faj. Thjesht mendoj që prindërit duhet të jenë më te kujdesshëm me fëmijët. Fëmijët i kuptojnë të gjitha, gjërat mbeten në mendje dhe në trup. Sa punë i duhet atij fëmijë të procesojë plagë të prindërve. Është hera e parë që i bën “DWTS” bashkë. I kujtoj vetes sime fëmijë sesi ja kam dalë, mund të jem krenare për veten time. Këtë këngën ia dedikoj edhe njerëzve që kanë qenë pjesë të jetë sime dhe më kanë dhenë mësime për jetën. Performanca ime shkon përtej vetes sime. Këtë dua, ta kem misionin përtej vetes. Ka njerëz që kanë shumë më shumë vështirësi, shumë sfida dhe shumë plagë dhe ata e dinë sesa dhembin, sa kohë duan të shërohen. Ne vendosim mburoja për të mos na u dëmtuar shpirti. Sfida më e madhe është mos ta humbasësh njeriun brenda teje. Unë nuk i vë faj prindërve. Unë mamin e babin i dua pafund. Jam e lumtur dhe krenare dhe unë kam shumë dashuri brenda vetes”, tha Enxhi Nasufi.
