Ikona gjeorgjiane e shahut, Nona Gaprindashvili, ka ngritur padi për shpifje ndaj platformës Netflix duke ju kërkuar pesë milionë dollarë dëmshpërblim me pretendimin se është portretizuar gabimisht në serialin, “The Queen’s Gambit”.
Padia ndërtohet mbi bazën e një sekuence në episodin e fundit të dramës ku thuhet se Gaprindashvili, nuk ka garuar kurrë kundër burrave.
Nga ana tjetër, sipas dokumentit që shahistja ka paraqitur, deri në vitin 1968 (viti në të cilin është vendosur episodi), ajo ishte përballur me të paktën 59 lojtarë burra.
Netflix tha se pretendimi nuk vlen aspak dhe nuk ka një përpjekje nga ana e tyre për të ulur vlerën e Nona Gaprindashvili si ikonë e shahut.
Përfaqësues të saj shprehen se kanë respektin më të madh për të dhe karrierën e saj, por patjetër që do mbrojen ndaj akuzave të shahistes.
“The Queen’s Gambit” bazohet në romanin e vitit 1983, shkruar nga Walter Tevis dhe historia ndërtohet mbi një shahiste imagjinare, e quajtur Beth Harmon, portretizuar nga Anya Taylor-Joy. Seriali u publikua vitin e kaluar, duke u bërë më i ndjekuri në ‘Netflix’ për kategorinë e tij.
“The Queen’s Gambit” është parë në më shumë se 62 milionë familje në 28 ditët e para pas publikimit. Ka fituar dhjetra çmime, e është nominuar në kompeticionet më prestigjoze./revistawho.com
