Një moment emocionues ndodhi gjatë spektaklit “Kënga Magjike”, kur Adi, një djalë nga Pogradeci që jeton në Gjermani, i propozoi për martesë të dashurës së tij, Kleas, live në skenë.
Gjithçka filloi si një surprizë e organizuar nga prezantuesja, e cila ftoi një grua nga publiku për një segment të veçantë. Ajo zgjodhi Klean, e cila u shoqërua në prapaskenë pa e ditur çfarë e priste. Ndërkohë, Adi u ftua në skenë për të rrëfyer historinë e dashurisë së tyre, të ndërmjetësuar nga Ardit Gjebrea.
Historia e çiftit
Adi dhe Klea u takuan për herë të parë në plazhin e Pogradecit. Ajo ishte me një grup vajzash dhe vëllain e saj të vogël, ndërsa Adi ishte me një mik. Një flirt i heshtur me shikime ndodhi mes tyre, por aty mbaroi gjithçka… për momentin.
Më vonë, Adi bëri një postim dhe etiketoi një lokal pranë plazhit. Lokali e ripostoi, dhe Klea e gjeti aty. Pasi e pa, ajo e ftoi nga adresa e vëllait, por e hoqi menjëherë ftesën. Adi, megjithatë, ishte i vëmendshëm, e pa ftesën dhe vendosi t’i shkruajë.
Aty filloi lidhja e tyre, dhe pas tre vitesh, Adi vendosi të bëjë hapin e madh.
Propozimi live
Pasi Klea u ftua në skenë, duke mos dyshuar për surprizën, Adi doli papritur nga prapaskena, u ul në gjunjë dhe i propozoi. Emocionuar dhe e befasuar, Klea tha “PO”, mes duartrokitjeve të zjarrta të publikut.
Ky moment romantik u kthye në një nga kulmet e spektaklit, duke prekur zemrat e të pranishmëve dhe të gjithë atyre që e ndoqën nga ekrani.
