Revistawho.com sjell çdo javë receta të ndryshme gatimi nga shefi i njohur i kuzhinës, Renato Mekolli. Njihuni me dy recetat e radhës.
Sallatë me patate
500gr patate
100gr sallam pikant
4 vezë të skuqura syze
Gjysmë speci jeshil
Gjysmë speci të kuq
Gjysmë tufe majdanoz
Gjysmë luge mustardë pikante
50gr ullinj jeshil pa bërthama
Kripë
Piper
100ml vaj ulliri
Lajmë patatet dhe i fusim me gjithë lëkurë në tenxhere. Hedhim ujë të ftohtë në të derisa të mbulohen patatet, u hedhim kripë dhe i vëmë të ziejnë. I kullojmë dhe i hedhim njëherë në ujë të ftohtë (për t’i qëruar më lehtësisht), i presim më katërsh dhe i vendosim në një enë. Presim hollë sallamin, perimet dhe erëzat dhe i bashkojmë me patatet. U hedhim vajin e ullirit, mustardën, kripën, piperin, vajin e ullirit, duke i përzier lehtë dhe disa pika limoni (të verdhë ose jeshil), nëse duam. Sallatën e përgatitur e vendosim në pjatën e secilit , duke vënë mbi të vezën syze.
Taljatele me fileto pule dhe domate të thara
500gr taliatele
300gr fileto pule
100gr domate të thara
100gr djathë pekorino
10 domate qershi
4 thelpinj hudhre
1 qepë e vogël
70ml vaj ulliri
1 lugë kafeje piper i ëmbël i kuq
1 tufë borzilok
Presim në kube fileton e pulës. Domatet e freskëta i presim në 4 pjesë, ndërsa domatet e thara i presim hollë. Grijmë qepën dhe hudhrat hollë. Në një tenxhere vendosim pastën të ziejë dhe në një tenxhere tjetër fillojmë përgatitjen e salcës: Hedhim qepën, hudhrat, fileton e pulës, domatet e thara dhe i skuqim për pak minuta. Më pas shtojmë domatet-qershi, piperin e kuq, kripën dhe borzilokun. Pasi të jenë lidhur dhe kanë marrë shijen e duhur, vendosim pastën në salcë, djathin e grirë, pak vaj ulliri dhe pak lëng nga makaronat e ziera, nëse duhet./revistawho.com
