Premiera e dokumentarit ‘Selena Gomez: My Mind & Me’, me fokus jetën e artistes, ka sjellë një polemikë që ajo nuk e kishte parashikuar. Ditët e fundit Selena ka marrë shumë kritika për shkak se harroi një emër që ishte i rëndësishëm. Artistja shpjegoi në dokumentarin e saj mënyrën se si u përball me famën dhe gjithashtu disa kapituj pak të njohur të jetës së saj. Ajo foli edhe për momentet më të vështira, siç është ai në të cilin iu desh t’i nënshtrohej një transplanti urgjent të veshkës. Në verën e vitit 2017, Gomez kishte lupus, një sëmundje në të cilën sistemi imunitar sulmon gabimisht qelizat dhe indet e shëndetshme dhe kishte nevojë urgjente për një transplant të veshkave. Shoqja e saj në atë kohë, Francia Raisa i dhuroi veshkën.
Marrëdhënia miqësore e Selenës dhe Francias papritmas u prish plotësisht. Thashethemet asokohe thanë se Francia nuk i pëlqente gjërat “shumë të pashëndetshme” që Selena po bënte si festa dhe pirja e alkoolit dhe kështu u distancua nga aktorja. “Selena bëri të kundërtën e asaj që tha se do të bënte kur të shërohej. Ajo tha se nuk do të pinte më. Francia i tërhoqi vëmendjen sepse kujdeset për të dhe e do. Ajo i tha asaj se po merrte vendime të këqija”, tha një mik i Francias.
Debati u rindez kur në dokumentarin e aktores, Francia nuk u përmend në asnjë moment, pavarësisht asaj që bëri për Gomez. Kjo ngjalli kritika dhe Selena reagoi së fundmi. “Më vjen keq që nuk përmenda të gjithë që njoh”, shkroi ajo në Twitter.
