Nëse divorci ishte proces i gjatë deri më sot, gjërat mund të ndryshojnë. Mund të kaloni nga gjykata te noteri. Ky diskutim ka nisur mes avokatëve dhe noterëve, nisur nga fakti se ka fluks të dosjeve në gjykata që presin gjykimin.
Noterët kanë hartuar një draftpropozim ku thuhrt që divorcet kur ka dakordësi mes çiftit të mos shkojnë në gjykatë, por të zgjidhin divorcin në zyrë noteriale. Sipas informacioneve, iniciativa është marrë nga drejtuesja e qendrës së trajnimit, noterja Elona Saliaj, e cila argumenton se për kjo nismë është nxitur nga numri i lartë i stokut të dosjeve në gjykata, por edhe ristrukturimi i sistemit të drejtësisë që po bëhet së fundmi në vendin tonë, me një hartë të re gjyqësore.
Ky vendim “frymëzohet” nga vende evropiane si Spanja, Greqia apo Rumania, ku divorcet kryhen në noteri.
“Nëse bashkëshortët kanë rënë dakord për zgjidhjen e martesës, duhet të bëhet një akt noterial dhe të depozitohet në gjendjen civile. Nëse ata bien dakord që fëmijët tu lihen për rritje dhe edukim njërit prind dhe detyrimi ushqimor prindit tjetër, atëherë të caktohet nga noteri një psikolog dhe pasi të merret raporti i përgatitur prej tij, t’i bashkëlidhet aktit përkatës. Natyrisht që në çdo kohë nëse prindi tjetër nuk është dakord me këtë mënyrë mund të kërkojë në gjykatë në çdo kohë heqjen e përgjegjësisë prindërore”,thuhet në draftpropozim.
Gjykata e miraton divorcin pas aktit në noteri.
Në projektmarrëveshjen e noterizuar ish-bashkëshortët, detajojnë përgjegjësinë prindërore, takimet me fëmijët sipas një kalendari javor dhe vjetor, por edhe detyrime të tjera që i marrin përsipër me vullnet të lirë.
