Mbrëmjen e kaluar, në një atmosferë magjike në Amfiteatrin e Liqenit në Tiranë, u zhvillua finalja e spektaklit të bukurisë “Miss Shqipëria” 2025. Ky konkurs, tashmë me një histori 27-vjeçare, ka udhëtuar mes qyteteve shqiptare duke promovuar bukurinë dhe trashëgiminë kulturore.
Fituesja e këtij edicioni ishte Valentina Gegprifti, e cila u shpall zyrtarisht “Miss Shqipëria” 2025. Bukuroshja shqiptare rrëmbeu kurorën dhe zemrat e publikut, duke u bërë përfaqësuesja e re e vendit në arenën ndërkombëtare të bukurisë.
Shoqëruese e parë u shpall Klea Thaçi, ndërsa vendin e tretë e zuri Laura Peka, si shoqëruese e dytë e konkurrimit.
Ndërkohë, Shqipëria do të ketë përfaqësim edhe në kompeticione të tjera ndërkombëtare: Natalia Lalaj do të mbajë titullin “Miss Super National” 2025 dhe Gledia Preka është shpallur “Miss International Albania” 2025.
Në këtë mbrëmje të veçantë nuk munguan as figurat publike nga fusha të ndryshme. Mes të ftuarve specialë ishin gazetarja Anila Basha, këngëtarja Zaimina Vasjari, këngëtarja Kejsi Tola dhe moderatorja Kiara Tito, të cilat shpallën disa prej çmimeve dhe ndanë emocionet me konkurrentet.
