Shpat Kasapi rrëfen në një intervistë për revistawho.com rikthimin e tij në skenën e festivalit “Kënga Magjike” dhe sqaron aludimet mbi një lidhje të mundshme me miss-in Albijona Muharremaj, që fitoi kurorën e më të bukurës në “Miss Gjermania”. Këngëtari tregon gjithashtu preferencat e tij për femrat dhe projektin për një klip të ri.
Shpati, rikthehesh në skenën e festivalit “Kënga Magjike”, këtë vit kur konkurrimi është ‘live’… Pse kjo zgjedhje?
E para, sepse e vlerësoj shumë festivalin “Kënga Magjike” si një ndër arenat më pretigjoze në mbarë trevat shqipfolëse. Së dyti, jam shumë ‘pro’ këndimit ‘live’ dhe së treti kisha një këngë të bukur, ndaj mendova ta lançoj në një event të këtyre përmasave.
Kush e ka shkruar këngën, po tekstin?
Kënga është kompozuar nga miku im, bashkëpunëtor i disa sukseseve, i madhi Gent Myftaraj, ndërsa teksti është shkruar nga i mirënjohuri Olti Curri.
A ka lidhje me ty kjo këngë?
Përveç faktit që unë jam këngëtari, nuk ka asnjë lidhje tjetër, jo atë që po dyshon ti të paktën.
U përfol së fundmi në media një histori e re dashurie, është e vërtetë?
Jo, s’ka asgjë të vërtet në këtë lajm. Albijonën e kam mikeshë të mirë dhe ne kemi pasur projekt që të bëjmë një fotosesion së bashku. Besoj që do ta realizojmë së shpejti.
Mediat shkruajtën qe ti je i fiksuar pas miss-eve. Është vërtet kështu?
Mua më pëlqejnë vajzat me fizik dhe paraqitje të bukur, por nuk do të thotë që më pëlqejnë vetëm miss-et, se nuk kanë vetëm ato fizik të mirë.
Çfarë të pëlqen më shumë tek një vajzë?
Tek vajzat shoh zakonisht atë që reflektojnë brenda, paraqitja e jashtme mund të jetë gënjeshtër.
Kur do të shohim sërish në ekran me një klip?
Së shpejti, me atë po merem.
